Як рӯз баъди зарбари Исроил ба макони ҷамъомади роҳбарони гурӯҳи Ҳамос дар Давҳа, сарвазири Қатар онро “амали террористии давлатӣ” хонда, гуфт, кишвараш барои посухи ҳуқуқӣ омода мешавад ва ҳақи посух ба ин ҳамларо ҳифз мекунад.

Исроил 9-уми сентябр ба макони ҷамъомади роҳбарони Ҳамос, гурӯҳи фаластиние, ки дар Ғазза бо артиши Исроил меҷангад, чанд зарба зад ва гуфт, ҳамла бо Амрико, шарики роҳбурдии Қатар, ҳамоҳанг шуда буд.

Ҳамон рӯз намояндаи Вазорати корҳои хориҷии Қатар ҳамлаи Исроил ба қаламрави кишварашро “ҷиноят ва буздилӣ” номид.

Баъди як рӯзи ҳамла, Муҳаммад бин Абдурраҳмон Оли Сонӣ, сарвазири Қатар гуфт, давлаташ дар бораи ҳамлаи Исроил аз пеш маълумот надошт ва Амрико ҳам дар бораи ҳамлаи Исроил пас аз 10 дақиқа хабар дод.

Ӯ ҳамлаи Исроил ба Давҳаро “амали террористии давлатӣ” номид ва таъкид кард, ки кишвараш барои посухи ҳуқуқӣ ба ин ҳамла гурӯҳе аз вакилони дифоро иттихоз кардааст.

“Давлати Қатар ҳаққи посух ба ин ҳамлаи Исроилро ҳифз хоҳад кард”, - зикр кардааст Муҳаммад бин Абдурраҳмон Оли Сонӣ.

Бояд гуфт, Исроил эътироф кард, ки ба Давҳа зарба задааст. Бенямин Нетаняҳу, сарвазири Исроил дар шабакаи Х навишт, ки “амалиёт”-и имрӯза кори дасти Исроил аст.

“Исроил  ташаббус кард, Исроил татбиқ кард ва Исроил масъулиятро ба таври комил ба зимма мегирад”, - навишт Нетаняҳу.

Расонаҳои Исроил навиштанд, ки Доналд Трамп, раисҷумҳури Амрико, барои зарба ба Ҳамос дар Қатар “чароғи сабз” нишон дода буд.

Доналд Трамп ҳарчанд аз зарбаи Исроил ба Давҳа норозигии худро баён кард, аммо онро маҳкум ҳам накард. Ӯ танҳо ба ҳамтоёни қатариаш ваъда кард, ки “ҳамчунин як рӯйдоде дар замини онҳо дигар такрор намешавад”.

Ҳамлаи Исроил ба Қатарро аксар кишварҳо маҳкум карданд. Аз ҷумла, Тоҷикистон онро “таҷовуз ба тамомияти арзӣ”-и Қатар дониста, қотеъона маҳкум кард.

Ёдовар мешавем, ки Исроил ҳадафи зарба ба Давҳаро “роҳбарони Ҳамос” номида буд. Баъди зарба ҳам расонаҳои исроилӣ аз эҳтимоли кушта шудани чанд роҳбари Ҳамос хабар доданд, аммо расонаҳои арабӣ, аз ҷумла “Al Jazeera” хабар дод, ки ҳамаи роҳбарони Ҳамос, ки ҳадафи ҳамла буданд, ҷон ба саломат бурдаанд.

Дар Telegram, Facebook ва Instagram бо мо бимонед.