Пагоҳ, 14-уми марти соли 2025 ҳодисаи табии гирифти Моҳ ё Моҳи хунин (Хусуф, Моҳгирифтагӣ) рух медиҳад. Ин падидаест, ки Замин дар байни Офтобу Моҳ қарор мегирад ва сояи Замин ба сатҳи Моҳ афтода, ранги онро сурхчатоб мегардонад.

Анвар Бӯризода, директори Институти астрофизикаи Академияи миллии илмҳои Тоҷикистон ба “Азия-Плюс” гуфт, ки гирифти пурраи Моҳ пагоҳ аз соати 8:57 то 15:00 ба амал меояд.

“Давомнокии умумии ин падидаи астрономӣ 6 соату 3 дақиқаро ташкил медиҳад, аммо қисми пурраи моҳгирифтанӣ 1 соату 5 дақиқа аз соати 11:26 то 12:31 ба вақти Душанбе давом мекунад”,-гуфт ин олими тоҷик.

Анвар Бӯризода
Акс аз ias.tj

Вале Анвар Бӯризода афзуд, сокинони Тоҷикистон гирифти Моҳро мушоҳида карда наметавонанд,  чунки “пагоҳ тулуи Моҳ соати 18:43 ва ғуруби он соати 6:38 бо вақти Душанбе ба амал меояд”.

Ин ҳодиса дар кишварҳои Осиёи Марказӣ ва Русия низ мушоҳида намешавад. Гуфта мешавад, ки гирифти Моҳро сокинони Африқои Ҷанубӣ, Амрикои Шимолӣ ва Ҷанубӣ, Аляска ва Гренландия мушоҳида карда метавонанд.

Гирифти Моҳ дар як сол аз 2 то 4 маротиба ба амал меояд ва як раванди табиӣ буда, ба саломатии инсонҳо ҳеҷ таъсире намерасонад.

ар Telegram, Facebook ва Instagram бо мо бимонед.