Шурӯъ аз 16-уми июн парвозҳои мустақим байни Душанбе ва Пекин дигарбора оғоз мегардад. Парвозҳо ҳафтае ду маротиба – рӯзҳои сешанбе ва шанбе тавассути ҳавопаймоии “China Southern Airlines” анҷом меёбанд.

Оҷонсии ҳавонавардии шаҳрвандии Тоҷикистон хабар медиҳад, ки ин тасмим дар пайи сафари Си Ҷинпин, раисҷумҳури Чин ба Тоҷикистон дар соли 2024 ва дастуру супоришҳои роҳбарони ду кишвар дар робита ба “зиёд намудани  теъдоди парвозҳо байни пойтахти Тоҷикистону Чин ва кушодани хатсайрҳои нави ҳавоӣ байни дигар шаҳрҳои ду кишвар” рӯи даст гирифта шуд.

Қаблан ҳам дар робита ба кушодани хатсайри ҳавоии мустақим байни Душанбе ва Пекин дар сатҳи мақомоти расмии ду кишвар гуфтушунидҳо баргузор шуда буд.

Вохӯрии намояндагони Тоҷикистону Чин дар робита ба оғози парвозҳои мустақим байни пойтахтҳои ду кишвар
Оҷонсии ҳавонавардии шаҳрвандии Тоҷикистон

Хатсайри ҳавои байни Душанбе ва Пекин соли 2016 роҳандозӣ гардида буд. Ҳамаи парвозҳо бо ин хатсайр бояд ҳафтае як бор рӯзҳои душанбе дар ҳавопаймоҳои Boeing 757 иҷро мешуданд. Вақти парвоз 5 соату 30 дақиқаро ташкил медод.

Пас аз се моҳ бо сабаби кам будани талаботи мусофирон, лозим омад, ки хатсайрҳо боздошта шаванд. Онҳо соли 2017 дубора барқарор гардида, лекин баъди чанде боз бекор шуданд.

Аз оғози соли 2020 бинобар сабаби хуруҷи пандемияи COVID-19 хатсайри ҳавоӣ байни Тоҷикистон ва Чин мутаваққиф шуд.

Хатсайр танҳо бо Урумчӣ барқарор шуд, ҳарчанд соли 2022 сардори Раёсати танзими авиатсияи граждании Агентӣ хабар дода буд, ки аз 23 июни соли 2022 мақомоти авиатсионии Тоҷикистону Чин дар бораи барқарор намудани хатсайри ҳавоии мустақим бо Пекин тавофуқ ҳосил кардаанд.

Муддати зиёд байни Тоҷикистону Чин парвозҳо танҳо бо хатсайри Душанбе - Урумчӣ сурат мегирифтанд.

Соли 2024 байни шаҳрҳои Хуҷанд ва Қошғар хатсайри ҳавоӣ боз шуд. Парвоз тариқи ин хатсайрро ширкати ҳавопаймоии "Chandu Airlines" анҷом медиҳад. Парвоз бо хатсайри Қошғар - Хуҷанд - Қошғар ҳафтае як маротиба анҷом дода шуда, вақти парвоз 1,5 соатро ташкил медиҳад.

Дар Telegram, Facebook ва Instagram бо мо бимонед.