Давоми 6 моҳи соли ҷорӣ муҳоҷирон ба Тоҷикистон 999 млн доллар пул интиқол доданд, ки дар муқоиса бо ҳамин давраи соли гузашта 174 млн доллар камтар аст.

Раиси Бонки миллии Тоҷикитсон (БМТ) Ҷамшед Нурмаҳмадзода зимни нишасти матбуотии имрӯза изҳор дошт, ки нисбат ба 6 моҳи соли 2019 нимсолаи аввал ҳаҷми интиқоли маблағ аз хориҷи кишвар ба Тоҷикистон дар умум ба андозаи 14,8% ё худ ба маблағи 195 млн доллар кам шудааст.

Раиси БМТ қайд кард, ки моҳи июн вазъияти вобаста ба интиқоли пул беҳтар шуд: дар ин моҳ ба андозаи 0,7% зиёдтар маблағ ирсол шудааст. Лекин дар бораи маҳз чӣ миқдор зиёд шудани он маълумот дода нашуд.

Аввали моҳи май зикр шуда буд, ки давоми якуним моҳ интиқоли маблағҳо аз Русия то нисф коҳиш ёфтааст.

“Ҳаҷми интиқоли маблағ аз Русия ба Тоҷикистон дар моҳи март ва нимаи аввали моҳи апрел 80 миллион доллар ё худ 50% кам шуд”, - қайд шуда буд дар мактуб-муроҷиати раисҷумҳури Тоҷикистон Эмомалӣ Раҳмон ба Хазинаи байнулмилалии асъор, ки дар он аз ин ниҳоди байнулмилалӣ кумаки молиявӣ дархост шуда буд.

Бино ба маълумоти Бонки марказии Русия, ҳаҷми интиқоли маблағ аз ҷониби шахсони воқеӣ аз Русия ба Тоҷикистон дар семоҳаи авввали соли 2020 ба андозаи 22,3% кам шуд.

Маблағи умумии интиқоли пули шахсони воқеӣ ба Тоҷикистон давоми моҳҳои январ-марти соли равон 359 млн долларро ташкил додааст, ки нисбат ба ҳамин давраи соли гузашта (462 млн доллар) ба миқдори 22,3% камтар аст.

Ҳанӯз моҳи апрел Бонки ҷаҳонӣ пешгӯйӣ карда буд, ки соли 2020 ҳаҷми интиқоли маблағ аз ҷониби муҳоҷирон дар саросари дунё босуръат коҳиш ёфта, қариб 20%-ро ташкил хоҳад дод.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.