Пас аз нашри маводи мо дар бораи хатсайрҳои чартерии баровардани ҳамватанон аз Русия, бисёре аз корбарон вобаста ба ин масъала саволҳои иловагӣ ирсол намуданд.

Бо мусоидати сафорати Тоҷикистон дар Русия ба саволҳои иловагии корбарон ҷавобҳо омода кардем.

Ҳеҷ гуна мушкилие надорам ва ба ватан баргаштан мехоҳам, оё ин имконпазир аст?

Бале! Пас аз ба ватан бурдани шаҳрвандон аз гурӯҳи афзалиятнок сафорат ба таҳияи рӯйхати дигар шаҳрвандоне, ки ҳеҷ мушкилие надоранд, оғоз кард. Барои номнавис шудан ба парвозҳои чартерӣ ба сафорати Тоҷикистон дар Маскав ва Консулгариҳои Тоҷикистон дар шаҳрҳои гуногуни Русия дархост пешниҳод кардан зарур аст.

Пас аз пешниҳоди дархост Шумо ба рӯйхати навбатдорон дохил шуда, вақте навбататон расид, кормандони сафорат бо шумо дар робита мешаванд. Айни замон сафорат ба баррасии дархостҳое оғоз кард, ки шаҳрвандон рӯзи 25 июни соли ҷорӣ пешниҳод карда буданд.

Чӣ гуна метавонам таъҷилӣ ба ватан равам, он ҷо мушкил пайдо шуд?

Агар Шумо мушкилие дошта бошеду таъҷилан ба ватан рафтанатон лозим аст, метавонед ба сафорати Тоҷикистон муроҷиат намуда, сабабҳои мушкилатонро шарҳ диҳед.

Агар кадоме аз хешовандону наздиконатон бемор шуда бошад, метавонед нусхаи маълумотномаи тиббӣ ё дигар ҳуҷҷтаҳои вобаста ба онро пешниҳод намоед.

Агар душаҳрвандӣ дошта бошам, ба Тоҷикистон баргашта метавонам?

Бале! Лекин бояд бо худ шиносномаи хориҷии тоҷикӣ дошта бошед. Агар шиносномаи тоҷикӣ надошта бошед, дар Консулгариҳои генералии Тоҷикистон дар Русия дар бораи бозгашт ба ватан маълумотнома гирифта метавонед.

Бо шиносномаи русиягӣ ба Тоҷикистон ворид шуда наметавонед.

Дар Русия бемори коронавирус шудам, ба ватан баргашта метавонам?

Бале! Агар шумо коронавирусро паси сар кардаву муолиҷа гирифта, комилан шифо ёфта бошед, барои бозгаштатон ба ватан ҳеҷ монеае вуҷуд надорад.

Пас аз бозгашт ба ватан бо хатсайри чартерӣ боз ба Русия баргашта метавонам?

Бале! Агар шумо қоидаҳои будбош дар Русияро вайрон накарда бошеду кормандони фурудгоҳ Шуморо дар бораи хориҷ кардан огоҳ накарда бошанд, пас аз боз шудани сарҳад ба Русия баргашта метавонед.

Хатсайрҳои ҳавоии мунтазам байни Тоҷикистону Русия кай барқарор мешаванд?

Санаи дақиқи барқарор шудани хатсайрҳои ҳавоӣ байни Тоҷикистону Русия алҳол номаълум аст. Ин масъала мавриди баррасӣ қарор дорад. Лекин яқин аст, ки баъди ба эътидол омадани вазъи вобаста ба коронавирус.

Чаро билетҳо ба хатсайрҳои чартерӣ ин қадр қиматанд?

Арзиши билетҳо аз ҷониби ширкати ҳавопаймоӣ бо назардошти парвоз муайян карда мешавад. Сафорат ба нархгузории билетҳо ягон муносибат надорад.

Сафорат танҳо рӯйхат тартиб дода, ширкатҳо мувофиқи ин рӯйхат билет мефурӯшанд.

Чӣ гуна ба Русия баргашта метавонам?

Агар шаҳрвандии Русия надошта бошед, то боз шудани сарҳадҳо ба ҳеҷ гунае ба Русия баргашта наметавонед. Агар шаҳрвандии Русия дошта бошед, дар портали хадамоти давлатӣ дар бораи бозгашт ба Русия худро ба қайд гузошта метавонед.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.