Дар пасманзари болоравии идомадоштаи нархҳо ба газу бензин, акнун дар Тоҷикистон камчинии сӯзишворӣ дар нуқтаҳои фурӯши он ба мушоҳида мерасад.
Дар баъзе нуқтаҳои фурӯши сӯзишворӣ нархи гази моеъ ба 8 сомонӣ расида, дар нуқтаҳое, ки он арзон аст, лимит ҷорӣ шудааст.
Дар нуқтаҳо сӯзишвории барои як рӯз пешбинишуда дар ду-се соат фурӯхта шуда, то рӯзи дигар фурӯши он қатъ мегардад.
Ронандагон шикоят мекунанд, ки барои ёфтани сӯзишворӣ аз як нуқта ба дигар нуқтаи фурӯш сарсону саргардон мешаванд.
Ба гунаи мисол, субҳи имрӯз як ронанда, сокини шаҳри Душанбе шикоят дошт, ки пайиҳам дар 4 нуқтаи фурӯши сӯзишворӣ бензин наёфтааст.
Кормандони нуқтаҳои фурӯш мегӯянд, нархи яклухт ба гази моеъ ва бензин боло рафта, намедонанд, ки пагоҳ нарх чӣ гуна мешавад.
Аввалин шуда ба болоравии нарх мусофирбарони хусусӣ “таваҷҷуҳ зоҳир намуданд” ва арзишии кирокаши 7-сомонӣ то ба 10-сомонӣ расид.
Нархи равуо аз пойтахт ба баъзе ноҳияҳо низ 3-5 сомонӣ зиёд шуд.
Дар нимаи аввали соли 2023 аз ҷониби 30 ширкати таҳвилгар ба ҷумҳурӣ ба маблағи умумии ҳудуди 100 млн доллар зиёда аз 174 ҳазор тонна бензини навъҳои гуногун ворид карда шуд. Аз ин миқдор 59%-аш ба ҳиссаи ширкати “Газппомнефт-Тоҷикистон” рост меояд.
Қобили зикр аст, ки маҳсулоти нафтӣ ба Тоҷикистон асосан аз Русия (85,4%), инчунин аз Қазоқистон (5,1%), Туркманистон (4,4%), Ӯзбекистон (2,6%) ва дигар кишварҳо (2,5%) оварда мешавад.
Дар нимсолаи аввали соли 2023 ба интиқоли гази моеъ ба ҷумҳурӣ 14 ширкат машғул шуда, ба маблағи умумии зиёда аз 66 млн доллар аз ин навъи сӯзишворӣ ба Тоҷикистон ворид кардаанд.
Гази моеъ ба Тоҷикистон умдатан аз Қазоқистон (73,5%) ва аз Русия (ҳудуди 24,7%) ворид карда мешавад.
Тавре ки маълум аст, айни замон дар Қазоқистон манъи содироти газ амал карда, дар Русия талошҳои вайрон кардани монополияи содироти “Газпром” ва ҷараёни бозтақсими ин маҳсулот сурат гирифта истодааст. Дар натиҷа натанҳо Тоҷикистон, балки дигар кишварҳои Осиёи Марказӣ низ дар ҳаҷмҳои нисбатан камтар ин маҳсулотро дастрас мекунанд.
Руcский