Моҳи августи соли равон дар Русия лоиҳаи қонун дар бораи аз шаҳрвандии Русия маҳрум кардан барои даст кашидан аз гузоштан ба қайди ҳарбӣ қабул шуд. Аз он замон хеле вақт гузашт. Ин қонун дар амал чӣ гуна иҷро мешавад.
Оё ин қонун кор мекунад?
Ҳолатҳои аз шаҳрвандӣ маҳрум кардан барои ба қайди ҳарбӣ нагузоштан аллакай ҷой доранд. Дар бораи теъдоди чунин шахсоне, ки аз замони мавриди амал қарор гирифтани қонун аз шаҳрвандӣ маҳрум шудаанд, маълумоти дақиқ дастрас нест, вале дар саҳифаоҳио расмии ВКД Русия дар шабакаҳои иҷтимоӣ баъзан доир ба чунин ҳолатҳо хабарҳо нашр мешаванд.
Масалан, моҳи ноябри соли ҷорӣ дар бораи аз шаҳрвандии Русия маҳрум кардани 3 мард аз Осиёи Марказӣ маълумот нашр шуд. Пас аз ин онҳоро лозим буд, ки дар муддати 15 рӯз қаламрави Русияро тарк кунанд, вагарна ихроҷ мешуданд.
Илова бар ин, оид ба ин масъала рейдҳо гузаронида шуда, моҳи октябр дар хостел ва хобгоҳҳои Домодедово мақомоти ҳифзи ҳуқуқ зиёда аз 280 хориҷиро ошкор карданд, ки шаҳрвандии Русияро гирифта, лекин худро ба қайди ҳарбӣ нагузоштаанд.
Қонун чӣ талаб мекунад?
Бо лоиҳаи қонуни қабулшуда метавонед бо ин пайванд шинос шавед. Бандҳои муҳими аз ин бахшҳо иборат аст:
- шаҳрвандони нав дар муддати ду ҳафта пас аз гирифтани шаҳрвандӣ бояд худро ба қайди ҳарбӣ гузоранд;
- агар онҳо ин корро накунанд, ВКД ба комиссариатҳои ҳарбӣ дар бораи онҳо маълумот медиҳад;
- минбаъд қонуншиканонро метавонанд аз шиносномаи додаи Русия маҳрум созанд.
Тағйироти мазкур аз ҷониби вакилони ҳизби "Русияи воҳид" (Единая Россия) пешниҳод шуд. Онҳо далел оварданд, ки бархе аз муҳоҷирон шаҳрвандии Русия гирифта, лекин аз иҷрои уҳдадориҳои ҳарбӣ дар баробари шаҳрвандони Русия даст мекашанд.
Ин қонун қисмате аз тадбирҳои шадидтар кардани сиёсати муҳоҷират мебошад, ки пас аз амали террористӣ дар “Крокус Сити Холл” оғоз шуд.
Қайди ҳарбӣ маънои онро дорад, ки дарҳол ба Украина мефиристанд?
Агар синнусоли даъватӣ бошеду ҳоло дар Тоҷикистон ҳам хидмати ҳарбӣ адо накардаед, пас шуморо метавонанд ба хидмати ҳатмии ҳарбӣ даъват кунанд. Лекин ин хидмат дар минтақаи амалиёти ҳарбӣ нест, балки адои хидмати “маъмулӣ” аст.
Дар авҷи амалиёти ҳарбӣ шахсоне ба Украина сафарбар мешаванд, ки қарордод бастаанд (яъне ҳамаи онҳоеро, ки барои ихтиёрӣ ба он ҷо рафтан тасмим гирифтаанд).
Аммо дар назар дошта бошед, ки эҳтимол шуморо маҷбур кунанд, ки қарордод бандед, зеро дар ин хусус ҳомиёни ҳуқуқ, аз ҷумла Валентина Чупик ба расонаи “Азаттык” изҳори назар кардаанд.
“Дар комиссариати ҳарбӣ онҳоро фиреб карда, “ин ҷову он ҷо имзо мон” мегӯянд ва имкон намедиҳанд, ки ба чӣ имзо гузоштанашонро донанд. Ё ба тарсонидан оғоз намуда, талаб мекунанд, ки барои ихтиёрӣ ба хидмати ҳарбӣ рафтан қарордод банданд”, - изҳор доштааст Валентина Чупик.
Лекин фарз мекунем, ки шумо қарордодро имзо накарда, аз комиссариати ҳарбӣ рафтед. Дар назар дошта бошед, ки дар ҳама гуна вақт метавонад фармон дар бораи сафарбарӣ содир шавад, тавре ки як маротиба сурат гирифта буд. Дар ин ҳолат ба шумо метавонад даъватнома ояд. Пас аз ин шумо дигар наметавонед аз Русия ба дигар кишвар равед. Шумо танҳо ба амалиёти ҳарбӣ рафта метавонед.
Ман қарор додам, ки худро ба қайди ҳарбӣ гузорам. Чӣ мебояд кард?
Барои ин метавонед ба комиссариати ҳарбӣ равед ё ҳамаашро онлайн тариқи портали "Госуслуги" анҷом диҳед.
Шумо дар Русия танҳо 15 рӯз ҳузур дошта метавонед. Агар аз ин муҳлат зиёдтар ҳузур дошта бошед, шуморо ихроҷ мекунанд. Агар шуморо маҷбуран аз кишвар хориҷ кунанд, нисбати шумо метавонад манъи вуруд ҷорӣ шавад.
Ман қарор додам, ки худро ба қайди ҳарбӣ намегузорам, маро дастгир ва аз шаҳрвандии Русия маҳрум карданд. Акнун чӣ мешавад?
Агар ихтиёрӣ дар муддати 15 рӯз аз замони маҳрум шудан аз шаҳрвандӣ қаламрави Русияро тарк кунед, манъи вуруд ҷорӣ намешавад.
Бо амвол чӣ кор мешавад?
Дар ҳолати маҳрум шудан аз шаҳрвандии Русия кори кортҳои бонкӣ ва реквизитҳо қатъ намешавад. Суратҳисобҳои шуморо касе мусодира намекунад.
Мутаносибан, агар шумо молу мулк, масалан хона ё мошин дошта бошед, наметавонанд онҳоро мусодира кунанд. Инҳо аз шумо боқӣ мемонанд.
Илова бар ин, маҳрумият аз шаҳрвандӣ ба ихтиёрдории ҳуқуқҳо дар молу мулкатон таъсир намерасонад, масалан дар фурӯхтан ё ба иҷора додани онҳо. Масалан, шумо метавонед дар Тоҷикистон зиндагӣ карда, хонаатонро дар Русия ба иҷора диҳед.
Руcский