Муштариёни ширкатҳои мобилӣ имрӯз, 18 апрел дар бораи гузаштан ба тарифҳои нав паёмак-огоҳинома нагирифтанд.

Ин амал миёни ҷомеа баҳсҳои зиёдеро ба бор оварда, бархе бар ин гумонанд, ки шояд фармоиши Хадамоти зиддиинҳисорӣ бекор шудаву тарифҳои нав танҳо барои муштариёни нав пешбинӣ гардидааст.

Дар ширкатҳои мобилӣ дар мавриди ин масъала хабар доданд, ки тарифҳои қаблан пардохтшуда то анҷоми муҳлати амалашон кор мекунанд ва шурӯъ аз имрӯз муштариёни нав бо тарифҳои нав ба шабака васл мешаванд.

“Тарифҳои пешина бо пардохти моҳона то муҳлати пардохтшуда амал мекунанд. Масалан, агар шумо ҳар санаи 15-ум пардохти моҳонаро анҷом диҳед, тарифатон то 15 май амал карда, баъд ба таври автоматӣ ба тарифи нав мегузаред. Агар тариф аз санаи 1-уми моҳ бошад, то 1 май амал мекунад. Муштариёни дорои тарифҳои бе пардохти моҳона тадриҷан то 25 апрел ба тарифҳои нав мегузаранд”, - хабар дод як манбаъ аз ширкатҳои мобилӣ.

Дар робита ба тарифҳо ва бастаҳои интернет зикр шуд, ки онҳо низ то муҳлати охири моҳ амал карда, агар баста барои як моҳ 15 апрел харида шуда бошад, он то 15 май амал мекунад.

“Бастаҳои интернети семоҳа мутаносибан то анҷоми муҳлат се моҳ амал мекунанд. Бастаҳои интернети солонаи ҳамаи ширктаҳои мобилӣ дар муддати 12 моҳ аз рӯзи харидориашон амал хоҳанд кард”, - итминон доданд дар ширкатҳо.

Ёдрас мекунем, ки аз 18 апрел дар тамоми операторони мобилии Тоҷикистон мувофиқи фармоиши Хадамоти зиддиинҳисории Тоҷикистон №31 аз 4 марти соли 2019 ҷадвали тарифҳои ягона ба хизматрасониҳои мобилӣ амал мекунад. Ҷадвали тарифҳо ба се навъ ҷудо шуд: бо пардохти моҳонаи 25, 30 ва 35 сомонӣ. Бо ин маблағ муштариён дар ҳамаи ширкатҳо дақиқаҳои баробар барои гуфтугӯро дастрас мекунанд.

Муштариён ба тарифҳои нав гузаронида мешаванд: Tcell тарифҳои худро “Салом” (1, 2, 3), “Мегафон Тоҷикистон” – “Простой” (1, 2, 3),  Babilon-М - «Муносиб» (1, 2 3) ва «Билайн» - “Қулай” (1,2,3) номидааст.

Хадамоти зиддиинҳисории Тоҷикистон операторони мобилиро уҳдадор намуд, ки арзиши 1 Мб Интернетро на камтар аз 5 дирам бе назардошти андоз муқаррар кунанд. Ҳамин тариқ, аз санаи 18-ум 1 гигабайт (1024 мегабайт) интернети ширкатҳои мобилии Тоҷикистон на камтар аз 63 сомонӣ (пешина - 30-35 сомонӣ) нарх хоҳад дошт. Аз ин бармеояд, ки интернети мобилӣ дар Тоҷикистон беш аз 2 маротиба қимат мешавад.

Бастаҳои интернет, ки қаблан ширкатҳои мобилӣ пешниҳод мекарданд, низ аз байн мераванд: барои ҳар 1 Мб муштарӣ 0,062 сомонӣ маблағ пардохт мекунад. Бастаҳо дигар фурӯхта нашуда, лекин қаблан пардохтшудаашон амал мекунанд.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.