Аввали ҳамин моҳ доир ба масъалаи таъсиси Феҳристи давлатии ягонаи нафақагирон машварат доир гардид, хабар медиҳад дафтари матбуоти Агентии суғуртаи иҷтимоӣ ва нафақаи назди ҳукумати Тоҷикистон.

Гуфта мешавад, иштирокчиёни машварат - намояндагони вазорату идораҳои дахлдор масоили риояи муқаррароти моддаи 45 Қонуни ҶТ «Дар бораи нафақаҳои суғуртавӣ ва давлатӣ» ва ҳамкорӣ дар ташкили Феҳристи ягонаи нафақагиронро баррасӣ карданд.

Ба иттилои манбаъ, дар ҷараёни ҷаласа роҳҳои ҳамкорӣ ва усулҳои мубодилаи иттилоотӣ байни мақомоти қудратӣ ва Агентӣ мавриди муҳокимаи васеи иштирокчиён қарор гирифт.

“Иштирокдорон ба мувофиқа расиданд, ки дар чорчӯбаи қонунгузории амалкунанда ташкили Феҳристи ягонаи нафақагирон мувофиқи мақсад буда, барои пешгирии ҳолатҳои содиршавии қонуншиканӣ дар соҳаи таъминоти нафақа мусоидат менамояд”, - омадааст дар хабари Агентӣ.

Тағйирот ба муқаррароти таъсис ва пешбурди Феҳристи ягонаи нафақагирон ба қонуни мазкур ҳанӯз моҳи марти соли 2015 ворид шуда буд.

“Бо мақсади таъмини баҳисобгирии нафақагирон ва амалӣ намудани ҳуқуқҳои онҳо ба таъминоти нафақавӣ, мақомоти ваколатдори давлатӣ дар соҳаи таъминоти нафақа вазифадор аст, ки баъди ба расмият даровардани ҳуҷҷатҳо барои таъини нафақа ҳамаи нишондиҳандаҳои онҳоро ба Феҳристи (рӯйхати) ягонаи давлатии нафақагирон дохил намояд”, - гуфта мешавад дар моддаи 45-и қонун.

Зикр мегардад, ки тамоми мақомоти дигари давлатӣ, ки ба зиммаи онҳо таъини нафақа вогузор мебошад, вазифадоранд маълумоти қайдгардидаро дар муддати 30 рӯзи баъди таъини нафақа ба мақомоти ваколатдори давлатӣ пешниҳод кунанд.

Тартиби пешбурди Феҳристи ягонаи давлатии нафақагиронро ҳукумати Ҷумҳурии Тоҷикистон муайян менамояд.

Тибқи маълумоти Агентии омор, ба ҳолати 1 марти соли 2021 шумори нафақахӯрон дар кишвар 734 ҳазору 611 нафарро ташкил медиҳад.

Маблағи миёнаи нафақа дар ҷумҳурӣ 321,63 сомонӣ ($28,4), маблағи миёнаи нафақаи корӣ - 391,27 сомонӣ ($34,6), нафақаи миёнаи суғуртавӣ - 289,67 сомонӣ ($25,6) ва нафақаи миёнаи иҷтимоӣ - 185,33 сомонӣ ($16,4) зикр мешавад.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.