Душанбе. 8-уми декабр. ОИ «Азия-Плюс» - Имрӯз, 8-уми декабр мардуми мусалмони ҷумҳурӣ аз муҳимтарин иди мазҳабии худ – Иди Қурбон таҷлил мекунанд.

Тавре аз Шӯрои уламои ҷумҳурӣ ба ОИ «Азия-Плюс» хабар доданд, соати 9-и субҳи имрӯз дар тамоми масоҷиди ҷумҳурӣ намози ид шурӯъ мегардад.

Иди Қурбон идест, ки онро ҳамасола мусалмонони ҷаҳон дар рӯзи 10-уми Зулҳиҷҷа пас аз 2 моҳу 10 рӯзи Иди Фитр ҷашн мегиранд. Ашхоси тавонманд дар ин рӯз, тибқи расми ин ойини мазҳабӣ, гӯсфанд қурбонӣ карда, ба ҳамсояҳои камбизоат ва мардуми дастнигар либосворӣ ва ё пулу маводи ғизоӣ кумак мекунанд. Дар Иди Қурбон мусалмонони ҷаҳон ба сафари ҳаҷ рафта, зиёрати Хонаи худоро ба ҷо меоранд.

Дар паёми табрикии худ ба мунсибаи таҷлили Иди Қурбон президенти мамлакат аҳамияти бузурги ин идро барои мардуми мусалмон таъкид карда, изҳор дошт, ки имсол беш аз 5 ҳазор нафар шаҳрвандони кишвар ба Маккаи мукаррама ва Мадинаи мунаввара сафар карда, дар ин рӯзҳо маросими ҳаҷро адо карда истодаанд.

«Итминони комил дорам, ки онҳо баъди адои маросими ҳаҷҷи акбар бо дилу нияти пок ба Ватан баргашта, дар корҳои ободониву бунёдкории диёри худ, инчунин тарғиби одобу ахлоқи ҳамида ва рафтору кирдори шоиста, махсусан ҷавонон нақши арзанда мегузоранд», - гуфт сарвари давлат.