Дар Вазорати фарҳанг ягон дастуре содир нашудааст, ки нашриёт китобҳоро танҳо баъди иҷозати Шӯрои бадеӣ нашр кунанд, вале онҳо муваззафанд, пеш аз нашр ҳар гуна китобро бо мақомотҳои дахлдор мувофиқат намоянд. Ин нукта дар посухи Вазорати фарҳанг ба мактуби “Азия-Плюс” зикр гардидааст. Дар зери мактуб муовини вазир Давлат Сафарзода имзо гузоштааст.

Чанде пеш пойгоҳи хабарии halva.tj бо истинод ба суханронии Давлат Сафарзода дар семинар-машварате, ки рӯзи 15-уми сентябр бо ҳузури масъулини соҳаи табъу нашр ва матбуот дар Вазорати фарҳанг баргузор гардид, иттилоъ дода буд, ки “аз ин ба баъд тамоми нашриёту матбааҳо, новобаста ба шакли фаъолияташон (хусусӣ ё давлатӣ), тамоми намуди китобҳоро дар мувофиқа бо Шӯрои бадеъии Вазорати фарҳанг нашр хоҳанд кард”.

Ин ниҳод дар мактуб навишт, “дар Вазорати фарханг ягон дастуре содир нашудааст, ки чопи китобҳоро танҳо баъди иҷозати Шӯрои бадеӣ иҷозат диҳад”.

“Дар нашриётҳои ҷумҳурӣ, сарфи назар аз шакли моликияташон, муҳаррирон фаъолият менамоянд, ки масъулияти хондану барои чоп розигӣ додан ва ё барои гирифтани хулоса ба ниҳодҳои дахлдор пешниҳод намудани асарҳоро доранд. Шарт нест, ки асарҳо ҳатман аз Шӯрои бадеии Вазорати фарҳанг гузаранд. Вале агар нашриёт зарур шуморад, метавонад барои гирифтани хулоса дар бораи асар ба вазорат муроҷиат намояд”, - омадааст дар мактуб.

Вале дар идома таъкид шудааст, ки “тибқи қонун чопи асарҳое, ки ба содир намудани ҷиноят, барангехтани кинаю адовати нажодӣ, миллӣ, маҳалгароӣ, динӣ, забонӣ, ташвиқоти ҷанг, зулму зӯроварӣ, фаъолияти террористӣ ва экстримистӣ, халалдор кардани тамомияти арзӣ ва мустақилияти давлат даъват мекунанд, мань аст”.

Тавре дар мактуб омадааст, нашриёти кишвар аз Вазорати фарҳанг Шаҳодатномаи баҳисобгирӣ ба муассисаҳои табъу нашр ва матбуот мегирад, ки дар он пеш аз нашри ҳар гуна китоб мувофиқа кардан бо мақомоти дахлдор тавсия дода шудааст.

“Нашриёт чопи китобҳои дарсӣ, адабиёти илмӣ, сиёсӣ ва диниро танҳо бо тавсияи мақомоти дахлдор бояд амалӣ созанд. Ҳар як асаре, ки ба нашриёт пешниҳод мегарданд, бояд ба мақомоти дахлдор: асарҳои адабӣ ба Иттифоқи нависандагони Тоҷикистон, илмӣ ба Академияи миллии илмҳои Тоҷикистон ва Сарредаксияи илмии “Энсиклопедияи миллии тоҷик”, динӣ ба Кумитаи дин, танзими анъана ва ҷашну маросими назди Ҳукумати Ҷумҳурии Тоҷикистон, тиббӣ ба Вазорати тандурустӣ ва ҳифзи иҷтимоии аҳолии Ҷумҳурии Тоҷикистон мувофиқа карда мешаванд”, - омадааст дар мактуби Вазорати фарҳанг.

Дар ҳамин ҳол, таъкид гардидааст, ки “дар Вазорати фарҳанг рӯйхати асарҳои интишорашон мамнӯъ вуҷуд надорад ва Вазорат дар масъалаи нашри китоб дар асоси қонунҳои амалкунандаи Ҷумҳурии Тоҷикистон фаъолият мекунад”.

Хабари минбаъд танҳо бо иҷозаи Шӯрои бадеии Вазорати фарҳанг чоп шудани китобҳо дар ҳоле нашр гардид, ки баҳсҳо атрофи китоби “Ҳаводиси рӯзгори ман”-и роҳбари беморхонаи “Ибни Сино” Абдухалил Холиқзода идома дорад.

Ин китоб, ки дар нашриёти хусусии “Эр-Граф” нашр шудааст, дар шабакаҳои иҷтимоӣ баҳсҳои зиёдро ба миён овард. Гурӯҳе онро асари шарҳиҳолӣ унвон карда бошанд, теъдоде муҳтавои баъзе аз қисматҳои онро қобили қабул надонистанд ва аз нашри он интиқод карданд.

Нафароне ҳам буданд, ки пешниҳоди барқарор кардани “Главлит”, ниҳоде, ки дар замони Шӯравӣ нашри китобҳоро назорат мекард, шуданд ва зикр карданд, ки тамоми китобҳо бояд пеш аз нашр аз назари мақомоти масъули давлатӣ гузарад.

Айни ҳол муаллифи китоби “Ҳаводиси рӯзгори ман” ва Абдуқодири Рустам, яке аз нависандагони номаш дар асар зикршуда, боздошт шудаанд.

Додситонии кул ҳардуи онҳоро барои барангехтани кинаю адовати миллӣ, нажодӣ, маҳалгароӣ ва ё динӣ гумонбар донистааст.

Дар Telegram, Facebook, Instagram, OK ва ВК бо мо бимонед.