Обид Назариён, муовини аввали вазири фарҳанги Тоҷикистон зимни нишасти матбуотӣ, дирӯз, 29-уми январ, гуфт, ҳадафи аслии танзими сафари ҳунармандони хориҷӣ ба Тоҷикистон, пешгирӣ аз порнография ва экстремизм мебошад.

Ба қавли муовини якуми вазири фарҳанг “сафари ҳунармандоне, ки ба Тоҷикистон меоянд, бо ҳамкории Вазорати корҳои хориҷии Тоҷикистон назорат карда мешавад”.

“Вазорати фарҳанг барномаи ҳунармандони хориҷиро ба он хотир талаб мекунад, ки донад барномаҳои порнографӣ ё экстремистӣ надошта бошанд. Мазҳ ба ин хотир барномаи онҳо бо мо бояд мувофиқа карда шавад”, - шаҳр дод Назариён.

Обид Назариён ба суоли такрории рӯзноманигорон дар бораи танзими сафари хориҷаи ҳунармандони тоҷик мушаххасан чизе нагуфт, танҳо зикр кард, ки “ин барои муаррифии миллату давлат кори муҳим аст ва ягон кори ғайриқонунӣ ҳам нест”.

Чанд рӯз пеш Радиои Озодӣ хабар дод, ки ба Қонуни нави фарҳанги Тоҷикистон илова ворид мешавад ва “аз ин ба баъд сафарҳои дохиливу хориҷии ҳунармандони тоҷик ва барномаи ҳунарии онҳо бояд бо Вазорати фарҳанг ҳамоҳанг карда шавад”.

Маҷлиси намояндагони Тоҷикистон тарҳи нави Қонун дар бораи фарҳангро охири соли гузашта тасвиб кард ва он аз рӯзи 18-уми январ расман ҳукми иҷро гирифт.

Дар Telegram, Facebook, Instagram, OK ва ВК бо мо бимонед.