Нерӯҳои марзбонии Тоҷикистон ҳамлаи рӯзи гузашта аз хоки Афғонистонро шарҳ дода, гуфтааст, ки ин кори дасти “се нафар аъзои ташкилоти террористӣ” буд, ки мехостанд, “ба яке аз дидбонгоҳҳои сарҳадии Қӯшунҳои сарҳадии Кумитаи давлатии амнияти миллии Ҷумҳурии Тоҷикистон ҳамлаи мусаллаҳона анҷом диҳанд”.

Ин ниҳод имрӯз, 25-уми декабр бо нашри як изҳорот дар хабаргузории давлатии “Ховар" гуфтааст, ки ҳамлагарон соати 23:30-и шаби 23-юми декабри соли 2025, дар минтақаи муҳофизатии дидбонгоҳи сарҳадии №5-и "Боғ", Отряди сарҳадии 0341 "Сарчашма”-и ноҳияи Шамсиддин Шоҳин сарҳадиро убур карда, ба Тоҷикистон гузаштанд.

Ба иттилои ин ниҳод, сарбозони тоҷик соати 11:15-и рӯзи 24-уми декабр "макони ҷойгиршавии террористон" дар ҳудуди Тоҷикистонро муайян кардаанд, вале "террористон ба амри сарҳадбонони тоҷик барои таслим шудан итоат накарда, муқовимати мусаллаҳона нишон доданд".

“Дар натиҷаи гузаронидани амалиёти ҷангӣ ҳар се нафар террористон безарар гардонида шуданд.  Аз ҷои ҳодиса 3 адад силоҳи оташфишони тамғаҳои М-16, автомати Калашников, 3 адад таппончаи истеҳсоли хориҷӣ бо таҷҳизоти садохомӯшкунак, 10 адад норинҷакҳои дастӣ, як адад дурбини шаббин, маводи тарканда ва дигар муҳимоти ҷангӣ мусодира гардид”, - гуфтааст Нерӯҳои марзбонии Тоҷикистон.

Ин ниҳод илова кардааст, ки дар пайи задухӯрди мусаллаҳона 2 афсари Қӯшунҳои сарҳадии КДАМ-и  Тоҷикистон - Зиреҳбон Наврӯзбеков ва Исматулло Қурбонов ҳалок гардиданд.

Ба таъкиди ин ниҳод, “дар як моҳи охир ин сеюмин ҳолати ҳуҷуми мусаллаҳона, содир намудани амали террористӣ ва убури сарҳади давлатӣ аз Афғонистон ба хоки Тоҷикистон аст, ки дар натиҷаи он кормандони мулкӣ ва хизматчиёни низомӣ ба ҳалокат расиданд”.

“Далелҳои мазкур исботи он аст, ки ҳукумати "Толибон"* дар иҷрои уҳдадориҳои байналмилалӣ ва ваъдаҳои пайдарҳами худ ҷиҳати таъмини амнияту субот дар сарҳади давлатӣ бо Ҷумҳурии Тоҷикистон ва мубориза бо аъзоёни ташкилотҳои террористӣ ноуҳдабароӣ, бемасъулиятии ҷиддӣ ва такроршаванда нишон медиҳад”, - гуфтааст Қушунҳои сарҳадии кишвар.

Ин ниҳод умедворӣ кардааст, ки “ҳукумати "Толибон" аз мардуми Тоҷикистон узрхоҳӣ намуда, барои таъмини амният дар сарҳадот бо Тоҷикистон тадбирҳои иловагии натиҷаманд меандешад”.

Қӯшунҳои сарҳадииТоҷикистон гуфтааст, ҳоло вазъ дар сарҳади давлатӣ ором буда, таҳқиқи ҳодиса идома дорад.

Қаблан, Радиои Озодӣ ва Рӯзномаи “Ҳашти субҳ”-и Афғонистон навишта буданд, ки дар пайи задухӯрд миёни марзбонҳои тоҷик ва як гурӯҳи мусаллаҳи қочоқбар аз Афғонистон ду марзбони тоҷик ва чанд фарди мусаллаҳ аз Афғонистон кушта шуданд.

Ёдовар мешавем, қаблан дар пайи ду ҳамлаи дигар дар рӯзҳои 26 ва 30-юми ноябр аз Афғонистон ба ноҳияҳои наздимарзии Тоҷикистон 5 шаҳрвандони Чин кушта ва панҷ нафари дигар захмӣ шуданд. Ин ҳамлаҳо аввал ба бошишгоҳи як ширкати маъдантозакунӣ дар ноҳияи Шамсиддин Шоҳин ва баъдан ба як ширктаи роҳсозӣ дар ноҳияи Дарвоз сурат гирифтанд.

Тоҷикистон ин ҳамлаҳоро шадидан маҳкум карда аз “Толибон” хоста буд, ки омилони онро дастгир кунанд. ВКХ-и ҳукумати Толибон гуфт, ки ҳамла тавассути гурӯҳҳое анҷом шудааст, ки ҳадафашон “эҷоди бесуботӣ ва беэътимодӣ миёни кишварҳои минтақа аст”.

Эмомалӣ Раҳмон, раисҷумҳури Тоҷикистон ин ҳамлаҳоро шадидан маҳкум карда, ба роҳбарони мақомоти қудратии кишвар дастур дод, ки "доир ба ҳалли масъала ва пешгирӣ аз такрори чунин ҳодисаҳои нохуш аз чораю тадбирҳои муассир кор бигиранд”.

*Дар Тоҷикистон гурӯҳи террористӣ эътироф шудааст.

Ҳар он чи дар Афғонистон рух медиҳад, метавонед мустақиман дар сужаи мо - "Афғонистон" бихонед.

 

 

 

 

Дар Telegram, Facebook ва Instagram бо мо бимонед.