Суди олии иқтисодии Тоҷикистон шикояти кассатсионии ҶДММ «Созидание» - молики меҳмонхонаи панҷситорадори Hyatt Regency Dushanbe ва Маркази тиҷоратии дараҷаи А «Созидание» дар Душанберо қонеъ накард.

Раиси Суди олии иқтисодии Тоҷикистон Наим Мансурзода зимни нишасти хабарии имрӯза дар ин робита изҳор намуд, ки акнун ширкат уҳдадор аст, ки қарзҳо аз андоз, ҷарима ва фоизҳо дар ҳаҷми беш аз 322 млн. сомонӣ (ҳудуди 60 млн. $)-ро пардохт намояд.

Ба гуфтаи ӯ, айни замон ҶДММ «Созидание» тамоми паҳлӯҳои ин масъаларо бо Кумитаи андоз мувофиқа мекунад. «Шикоят ба суди байнулмилалӣ ҳуқуқи конститутсионии ҳама шахсони воқеъиву ҳуқуқӣ аст, вале то он дам гузаштнаи тамоми марҳилаҳои суди дохилӣ зарур мебошад», - афзуд номбурда.

Бо қарори ҳукумати Тоҷикистон, ки ахири моҳи январ аз ҷониби раиси ҳукумат Эмомалӣ Раҳмон ба имзо расида буд, КВД «Ширкати алюминии тоҷик» (ТАЛКО) қарзҳои ҶДММ«Созидание» аз андоз, ҷарима ва фоизҳо дар ҳаҷми беш аз 322 млн. сомонӣ (ҳудуди 60 млн. $)-ро бояд пардохт намояд.

Ёдрас мекунем, ки чанде қабл КВД «Ширкати алюминии тоҷик» (ТАЛКО) ва ширкати алюминии «Русал»-и Русия оид ба даст кашидан аз даъвоҳои мутақобила тавофуқ ҳосил карданд.

Ҳамчунин қобили зикр аст, ки соли 2013 Кумитаи андоз маблағи зиёди қарз аз андози ҶДММ «Созидание» - молики меҳмонхонаи панҷситорадори Hyatt Regency Dushanbe ва Маркази тиҷоратии дараҷаи А «Созидание» дар Душанберо ошкор намуд.

Суди олии иқтисодии Тоҷикистон шикояти кассатсионии ҶДММ «Созидание» аз болои қарори Суди иқтисодии шаҳри Душанбе дар бораи маҷбуран рӯёнидани қарзҳо аз андоз дар ҳаҷми 67 млн. $-ро  қонеъ накард.