Ба ҳолати 1 октябри соли 2021 ҳаҷми умумии қарзи берунаи Тоҷикистон 3 млрд 262,1 млн долларро ташкил медиҳад, хабар медиҳад Вазорати молияи ҷумҳурӣ.

Дар оғози соли ҷорӣ ҳаҷми ин қарз 3 млрд 243,7 млн долларро ташкил дода, дар ин давра ба миқдори 18,4 млн доллар зиёд шудааст.

Дар сохтори қарзи беруна 96,4% ба “қарзи бевоситаи давлатӣ рост меояд, ки иҷрои хидматрасониҳои ҳукуматро таъмин мекунад”. Ин ҷо сари қарзҳое сухан меравад, ки барои амалисозии лоиҳаҳои давлатии сармоягузорӣ ҷалб шудаанд.

Давоми моҳҳои январ-сентябри соли ҷорӣ ҳаҷми умумии чунин қарзҳо 11,6 млн доллар афзуда, ба ҳолати 1 октябр 3 млрд 144 млн долларро ташкил додаанд.

Қарзи Бонки миллии Тоҷикистон назди Хазинаи байнулмилалии асъор, Чин ва Бонки исломии рушд то 8,9 млн доллар (аз 15 млн доллар дар аввали сол) кам шудааст.

Дар ҳамин ҳол, ҳаҷми дигар қарзҳо бо кафолати давлатӣ то 111,4 млн доллар (аз 96,3 млн доллар) зиёд шудааст.

Дар Буҷети давлатии соли 2022 барои татбиқи лоиҳаҳои давлатии сармоягузорӣ ҷалби ҳудуди 290 млн доллар пешбинӣ шудааст.

Таносуби қарзи хориҷии Тоҷикистон ба Маҷмӯи маҳсулоти дохилӣ (ММД)-и кишвар 38,2%-ро ташкил медиҳад.

Ёдрас мекунем, ки таносуби ҳадди ниҳоии иҷозашудаи қарзи беруна нисбати МДД барои кишварҳои сатҳи даромадашон паст тибқи тавсияи ниҳодҳои байнулмилалии молиявӣ 40%-ро ташкил медиҳад.

Тоҷикистон ба Чин, Бонки ҷаҳонӣ ва Бонки осиёии рушд низ дар ҳаҷми начандон зиёд қарздор мебошад.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.