Душанбе. 22-юми май. ОИ «Азия-плюс» - Дар посух ба изҳороти ҳукумати Тоҷикистон ба ҷомеаи ҷаҳонӣ дар мавриди расонидани ёрии таъҷилӣ ба осебдидагон аз офатҳои табиӣ, ҳукумати Ӯзбекистон тасмим гирифт, ки ба аҳолии осебдидаи кишвари ҳамсоя дасти ёрӣ дароз мекунад.

            Чӣ тавре ки ба ОИ «Азия-Плюс» аз сафорати Ӯзбекистон дар ҶТ иттилоъ доданд, рӯзҳои наздик тавассути роҳи оҳан ба Тоҷикистон дар ҳаҷми беш аз 1400 тонна кӯмаки башардӯстонаи Ӯзбекистон фиристода мешавад, ки аз маводи ғизоӣ ва масолеҳи сохтмон иборат хоҳад буд.

            Бино ба иттилои манбаъ, бо назардошти ирсоли таъҷилии кӯмаки башардӯстона ба минтақаҳои осебдида, ҷониби Ӯзбекистон аз мақомоти дахлдори Тоҷикистон дархост кардааст, ки саривақт кишвари ҳамсояро дар бораи воситаҳои ҳарчи зудтар ба маҳали ҳодиса расонидани кӯмак огоҳ созад.