Дар вилояти Суғд бар асари беэҳтиётии ронанда духтарчаи ноболиғ зери чархи автомашина монда, ба ҳалокат расид.

Тавре ба «Азия-Плюс» аз Раёсати ВКД Тоҷикистон дар вилояти Суғд хабар доданд, субҳи рӯзи 22 июл ронандаи 25-солаи автомашинаи тамғаи «Мерседес-Бенс», сокини шаҳри Панҷакент ҳангоми ҳаракат бо роҳи мошингарди Панҷакент - Саразм аз уҳдаи идораи воситаи нақлиёт набаромада, сокини маҳаллӣ духтарчаи 4-соларо бо автомашинааш пахш мекунад, ки дар натиҷа духтарча аз ҷароҳатҳои вазнини бардошта дар ҷойи ҳодиса ба ҳалокат расидааст.

Тибқи маълумоти Шуъбаи БДА дар вилояти Суғд, дар зарфи 6 моҳи соли равон дар роҳҳои автомобилгарди минтақаи шимоли кишвар 139 ҳодисаи (ҳамин давраи соли гузашта – 157 ҳодиса) садамаи нақлиёт ба қайд гирифта шуда, бар асари он 53 нафар ҳалок (соли 2015 – 63 нафар) ва 141 нафар (соли 2015 – 165 нафар) ҷароҳатҳои ҷисмонӣ бардоштанд.

Дар ин давра бо иштироки кӯдакон 42 ҳодисаи садамаи нақлиёт (соли 2015 – 35 ҳодиса) ба қайд гирифта шуда, 9 нафар ноболиғон (соли 2015 – 11 нафар) ҳалок ва 36 нафар кӯдакон (соли 2015 - 31 нафар) ҷароҳат бардоштанд.