Тайи се рӯзи гузашта бар асари садамаҳои васоити нақлиёт 7 кас фавтида, 6 нафар маҷруҳ шудаанд.

Тибқи иттилои ВКД, рӯзи 9-уми ноябр дар роҳи автомобилгарди Данғара-Бохтар ронандаи автомашинаи тамғаи “Опел-Астра” Қудрат Муъминов дар ҳудуди ноҳияи Кушониён ба самти муқобили ҳаракати роҳ баромада, ба автомашинаи тамғаи “Опел-Астра” таҳти идораи Муҳсин Рамазонии 29-сола бархӯрдааст.

Дар натиҷа ҳар ду ронанда ва мусофирони дохили автомашинаҳо – Ҷурахон Маҳмадалиев ва як нафари шахсияташ номаълум дар ҷойи ҳодиса фавтидаанд. Се мусофири дигари автомашинаҳо ҷароҳатҳои гуногуни ҷисмонӣ бардошта, бистарии беморхона шудаанд.

Дар ин рӯз ҳамчунин ронандаи боркашони “Камаз” Фахриддин Шарифов ҳангоми ҳаракат дар шоҳроҳи “Душанбе-Хуҷанд-Чанок” пиёдагарди 69-сола Тошпулод Ғаниевро дар ҳудуди ноҳияи Айнӣ пахш кардааст. Пиёдагард дар ҷойи ҳодиса ба ҳалокат расидааст.

Рӯзи 10-уми ноябр боз як садамаи нақлиётӣ дар ҳудуди ноҳияи Файзобод рух додааст. Зимни бархӯрди автомашинаҳои тамғаи “Мерседес-Бенс” ва “Даймер-Крайслер” 3 мусофири маҷруҳ ба дармонгоҳ интиқол дода шудаанд. Як мусофири дигари мошини “Даймер-Крайслер” Файзалӣ Саъдиев дар беморхона фавтидааст.

Ҳамчунин рӯзи 8-уми ноябр ронандаи автомашинаи тамғаи “Тойота-Корола” Миҷгона Қурбонова дар ҳудуди ноҳияи Данғара пиёдагард Файзалӣ Усмоновро пахш кардааст. Аз ҷароҳатҳои вазнини бардошта пиёдагард дар беморхона ба ҳалокат расидааст.

Аз рӯйи ҳодисаҳои мазкур таҳқиқот идома дорад.

Дар TelegramFacebookInstagramViberЯндекс.ДзенOK ва Google Новости бо мо бимонед.