Милистияи Душанбе аз худкушии як духтари 20-сола хабар медиҳад. Ин ниҳод мегӯяд, ҳодиса тақрибан соати 9:10 дақиқаи дирӯз, 28-уми ноябр рух дода, духтар худро аз тирезаи бинои 10-ошёнаи кӯчаи Садриддин Айнӣ ба замин партофтааст.

Ба иттилои РВКД дар шаҳри Душанбе ин духтар зодаи ноҳияи Нуробод буда, муваққатан дар ноҳияи Рӯдакӣ истиқомат мекард.

“Зимни азназаргузаронӣ аз ҷайби марҳум навиштаҷоте бо мазуни «аз ягон нафар шикоят надорам» дарёфт гардидааст”, - менависад РВКД дар шаҳри Душанбе.

Ин ниҳод гуфтааст, хешовандони марҳум низ муайян карда шуда, санҷиш аз ҷониби Прокуратураи ноҳияи Шоҳмансур ҷараён дорад.

Ҷараёни ҳодисаи мазкур
РВКД дар шаҳри Душанбе

Сабаби аслии даст ба худкушӣ задани ин духтари 20-сола то ҳол маълум нест ва аниқ нест, ки чӣ гуна ӯ ба Душанбе омада, ба бинои 10-ошёна баромад ва чаро худро аз тиреза ба поён партофт.

Ёдовар мешавем, ки дирӯз, 28-уми ноябр дар шабакаҳои иҷтимоӣ аксу навори даст ба худкушӣ задани як духтари ҷавон нашр шуд, ки боиси ҳадсу гумонҳои гуногун гардид.

Ёдовар мешавем, ки дар шаш моҳи соли ҷорӣ, 108 ҳолати худкушӣ ва сӯиқасд ба ҷони худ аз ҷониби занон ва духтарони ноболиғ ба қайд гирифта шудааст. Ин нишондиҳанда нисбат ба ҳамин давраи соли 2021 адад кам аст.

Дар ҳамин ҳол, коршиносон мегӯянд, сабаби аслии даст ба худкушӣ задани занону духтарон низоъҳои оилавӣ ва хушунати хонаводагӣ мебошад.

Мақомот ин иддаоро рад карда, худкушии занону духтаронро бештар ба бемории рӯҳӣ рабт медиҳанд.

Дар Telegram, Facebook, Instagram, OK ва ВК бо мо бимонед.