Консулгарии генералии Ӯзбекистон дар Владивасток дар робита латукӯб ва таҳқири чанд шаҳрвандаш дар ин кишвар ба мақомоти Русия нотаи расмӣ фиристодааст. Дар ин бора Юсуф Кобулҷонов, консули генералии ин кишвар хабар додааст, менависад хабаргузории "Фарғона".

Шаби 10-уми сентябри соли равон дар минтақаи Приморск як гурӯҳ наврасон дар ҳолати мастӣ ба автомашинае осеб расонида, ба дохили он газ мепошанд ва сипас ба ронандаи мошини боркаш дармеафтанд.

Дар идома дар дохили мағозаи шабонарӯзӣ ба як ронандаи таксӣ ва мусофираш, ки гуфта мешавад шаҳрвандони Ӯзбекистонанд, дарафтода, онҳоро аз нигоҳи нажодӣ таҳқир ва латукӯб мекунанд. 

Ҳоло шахсияти ҳамаи ҳамлагарон муайян карда шуда, яке аз онҳо боздошт ва ду нафари дигардар ҷустуҷӯ қарор доранд.

Юсуф Кобулҷонов гуфтааст, ки дар Кумитаи тафтишотии Русия  дар пайи ин ҳодиса бо пайванд ба авбошӣ парвандаи ҷиноятӣ оғоз гардидааст.

Манбаъ мегӯяд, ба осебдидагон кумаки ҳуқуқӣ расонида, онҳо ба мақомоти пулиси Владивосток муроҷиат кардаанд.

Дар Консулгарии генералӣ зикр кардаанд, ки ин қазия зери назорати намояндагиии дипломатӣ ва мақомоти ҳифзи ҳуқуқи Русия қарор дорад. Дар ҳамин ҳол, дипломат аз корбарони шабакаҳои иҷтимоӣ хоҳиш намудааст, ки эҳтиёткор бошанд ва ба даъватҳои худсарона маҳкум кардани гунаҳкорон роҳ надиҳанд.

Бори аввал нест, ки Ӯзбекистон дар робита ба бархурди тунди шаҳрвандон ва мақомоти Русия нисбат ба табааш  ба ин кишвар нотаи эътирозӣ мефиристанд. Аз ҷумла, аввали моҳи сентябр ВКХ Ӯзбекистон бо ирсоли як нотаи расмӣ ба ВКХ Русия хост, шахсияти фарде, ки дар Химкии вилояти Маскав як ронандаи таксии узбекро таҳқир кардааст, шиносоӣ карда, алайҳи ӯ чораи қонунӣ андешад.

Дар Telegram, Facebook ва Instagram бо мо бимонед.