Хуҷанд. 10-уми сентябр. ОИ «Азия-Плюс» - Дар Исфара шахсони номаълум бо истифода аз силоҳи оташфишон боз як корманди милисаро захмӣ карданд. Манбаъи мӯътамад аз мақомоти ҳифзи ҳуқуқи вилоят ба хабарнигори ОИ «Азия-Плюс» иттилоъ дод, ки ҳодиса чанд рӯз қабл рух додааст. Аз додани маълумоти муфассал дар ин хусус худдорӣ карда шуд. Танҳо ҳаминаш муайян аст, ки милисаи захмишуда дар беморхона табобат мегирад.

Ёдрас мекунем, шоми 28-уми августи соли равон дар ҷамоати Чоркӯҳи ноҳияи Исфара шахсони номаълум ба сӯи кормандони шӯъбаи умури дохилии Исфара-2 аз автомат оташ кушода, сипас аз ҷои ҳодиса ғайб зада буданд. Афсарон Фирӯз Олимови 28-сола ва Ҷамшед Аҳмедови 22-сола ҳангоми назорати кӯчаҳои маркази шаҳри Исфара дар дасти ду нафар шахсони шубҳанок сумкаи калони сиёҳеро мушоҳида мекунанд ва аз онҳо хоҳиш мекунанд, ки чизҳои дар сумка бударо нишон диҳанд, вале шахсони шубҳанок аз ин амал саркашӣ мекунанд. Қарор мешавад, ки онҳо ба шӯъба бурда шаванд. Ҳар чаҳор нафар ба мошини милиса менишинанд ва дар роҳ яке аз онҳо аз дохили сумка силоҳи оташфишонро гирифта милисаҳоро мепарронад ва пас аз ин онҳо аз ҷои ҳодиса ғайб мезананд. Ҷинояткорон то ҳанӯз дастгир нашудаанд ва тафтишот идома дорад.