Дар мурофиаи судӣ оид ба баррасии парвандаи собиқ муовини сардори шуъбаи корҳои дохилии ноҳияи Қумсангир Нуриддин Наботов ва сардори шуъбаи мубориза бо гардиши ғайриқонунии маводи нашъаовари ШКД-и ҳамин ноҳия Маҳмад Шарифов айбдоркунандаи давлатӣ ба Н.Наботов 10 сол ва М. Шарифов 14 соли таъини ҷазои маҳрум кардан аз озодиро талаб намуд.
Н.Наботов дар содир наудани ҷиноят тибқи моддаҳои 314 (Суистифода аз ваколатҳои мансабӣ), 316 (Баромадан аз ҳадди ваколатҳои мансабӣ), 358 (Ғайриқонунӣ дастгир ё ҳабс намудан), 319 (Гирифтани пора) ва 247 (Қаллобӣ)-и КҶ ҶТ гумонбар дониста мешавад.
М. Шарифов бошад, дар содир намудани ҷиноят мутобиқи моддаҳои 247 (Қаллобӣ), 323 (Сохтакории хизматӣ), 314 (Суистифода аз ваколатҳои мансабӣ), 316 (Баромадан аз ҳадди ваколатҳои мансабӣ), 319 (Гирифтани пора) ва 200 (Муомилоти ғайриқонунии воситаҳои нашъадор ё моддаҳои психотропӣ бо мақсади ба соҳибияти каси дигар додан) айбдор карда мешавад.
Ба андешаи айбдоркунандаи давлатӣ дар ҷараёни тафтишоти пешакӣ ва мурофиаи судӣ гуноҳи судшавандагон пурра собит шудааст, аммо вакилони мудофеи айбдоршавандагон мухолифи ин ақидаанд.
Рустам Давлатшоев, вакили мудофеи Наботов мегӯяд, айби зерҳимояи ӯ дар мавриди соли 2001 зимни фаъолият дар ШКД-и вилояти Хатлон ғайриқонунӣ боздошт кардан ва мавриди шиканҷа қарор додани сокини ноҳияи Вахш Абдухалил Қодиров асоси воқеӣ надорад, зеро ин парванда чандин маротиба аз ҷониби Прокуратураи генералӣ мавриди баррасӣ қарор гирифта, қатъи он қонунӣ шуморида шуда буд. «Акнун баъди гузашти солҳо маълум мешавад, ки парванда ғайриқонунӣ қатъ гардида, баррасии он дубора аз сар гирифта шуд», - гуфт ӯ.
Давлатшоев аз дигар моддаҳои КҶ, аз ҷумла моддаи «Гирифтани пора», ки зерҳимояаш айбдор мешавад, низ изҳори шубҳа намуда, изҳор кард, ки гуноҳҳои ба зерҳимояи ӯ пешниҳодшуда исботи худро наёфтаанд.
«Тамоми далелҳои ҷониби айбдоркунанда ба аризаи ҷониби гӯё ҷабрдида бандубаст шуда, далелҳои мушаххаси айби Наботов мавҷуд нестанд ва аз ин рӯ, ман аз суд дархост мекунам, ки тамоми гуноҳҳои ба дӯши зерҳимояам вогузоршуда бекор гардида, бегуноҳии ӯ эътироф ва аз толори суд озод карда шавад», - иброз дошт Давлатшоев.
Татяна Умарова, адвокати Маҳмад Шарифов, аз мавқеи ҳамтои худ пуштибонӣ намуда, изҳор кард, ки парвандаи ҷиноӣ нисбат ба собиқ муовини ШКД-и ноҳияи Қумсангир сохтакорӣ шудааст. Суд то 24-уми май танаффус эълон кард.
Баррасии парвандаи ҷиноии собиқ муовини сардори шуъбаи корҳои дохилии ноҳияи Қумсангир Нуриддин Наботов 19-уми апрел оғоз гардид. Дар таърихи 7-уми октябри соли 2011 мақомоти прокуратураи вилояти Хатлон нисбат ба муовини сардори ШКД-и ноҳияи Қумсангир Нуриддин Наботов ва сардори шӯъбаи мубориза бар зидди муомилоти ғайриқонунии маводи мухаддири ҳамин ноҳия Муҳаммад Шарифов парвандаи ҷиноӣ боз намуда буд.
Дар ҷараёни тафтишот ошкор шудааст, ки кормандони милиса бо мақсади минбаъд тамаъ кардани пора ба дохили автомашинаи яке аз соҳибкорони маҳаллӣ маводи нашъаовар партофтанӣ шудаанд ва ин ҳодиса боиси боздошти онҳо шудааст.
Сарбозони дар артиши Тоҷикистон зарардида чӣ гуна ҷуброн метавонанд дастрас кунанд?
Имсол дар Иди ғалаба гузашти ҳарбӣ доир намешавад
Мулоқоти Сироҷиддин Муҳриддин бо Сафири Арабистони Саудӣ
Мақомоти Тоҷикистон барои расидагӣ ба мушкили муҳоҷирон ба фурудгоҳҳо рафтанд
“Ҳоҷиҳо, ришдорон ва ба Туркия рафтаҳо ихроҷ шуданд”. Нақли муҳоҷирони аз Русия ихроҷшудаи тоҷик
Даргузашти фарҳангшиноси маъруф ва мунаққиди синамо Саъдулло Раҳимов
Лотереяи Green-Card: акнун метавонед бисанҷед, ки бурд кардед ё не
Се медали ҷудокорони тоҷик дар рӯзи якуми мусобиқаи Dushanbe Grand Slam 2024
Путин Эмомалӣ Раҳмонро ба Маскав даъват кард. Суҳбати роҳбарони ду давлат дар пайи мушкилоти муҳоҷирони тоҷик дар Русия
Мушкили шадиди дастрасӣ ба иттилоъ. Идомаи фишор ба расонаҳо ва рукуди озодии баён
Кулли ахбор
Авторизуйтесь, пожалуйста