Давоми тақрибан як соле, ки “Толибон” дар раъси ҳукумати Афғонистон қарор доранд, воридоти беш аз 3 тонна маводи мухаддир ба Тоҷикистон пешгирӣ карда шудааст. Ин дар ҳолест, ки дар тамоми соли 2020 ҳаҷми содироти маводи мухаддир дар сарҳади ин кишвар 1 тоннаро ташкил дода буд.

“Толибон”, ки моҳи августи соли гузашта ба сари қудрат омаданд, кишт, тавлид ва хариду фурӯши маводи мухаддир дар Афғонистонро мамнӯъ эълон карда буданд. Вале ба гуфтаи масъулин, вазъ баръакс шудааст.

Ҳабибулло Воҳидзода, мудири Оҷонсии назорати маводи нашъаовари Тоҷикистон имрӯз, 5 август дар нишасти хабарӣ гуфт, дар шаш моҳи соли равон 14 қоҷоқбари хориҷиро дастгир карданд, ки ҳамаи онҳо шаҳрвандони Афғонистон буданд. Боздошти қочоқбарони хориҷӣ нисбат ба ҳамин давраи соли 2021-ум 9 нафар зиёд шудааст.

“Баъди ба сари ҳокимият омадан, “Толибон” тариқи ВАО изҳори назар карда, ниятҳои худро нисбати шахсоне, ки ба истеҳсол ва қочоқи маводи мухаддир машғул буданд, баён доштанд. Онҳо нисбати қочоқбарон ва чунин ашхос чазоҳои сангин муайян карданд ва гуфтанд, пеши роҳи фурӯшу паҳни онро мегиранд. Вале дар асл ҳамин чиз дида намешавад”, - нигаронӣ кард Воҳидзода.

Воҳидзода ҳамчунин, гуфт, афзоиши мусодираи маводи мухаддир дар соли 2022 дар кишвар ба қочоқи он аз Афғонистон рабт дорад.

Гуфта шуд, ки дар шаш моҳи соли ҷорӣ дар ҷумҳурӣ аз муомилоти ғайриқонунӣ 2 тоннаву 578  кг 145 грамм маводи нашъаовар мусодира шудааст, ки ин нисбат ба ҳамин давраи соли 2021 (1 тоннаву 695 кг 645 грам) 52 дарсад ё 882, 5 кг зиёд мебошад.

Ёдовар мешавем, ки моҳи апрели соли равон ҳукумати “Толибон” бо як фармони махсус тавлид ва хариду фурӯши маводи мухаддир дар Афғонистонро манъ карданд.

Дар фармони раҳбари Толибон, ки аз сӯи Ҳайбатуллоҳ Охундзода, раҳбари ин гурӯҳ имзо шуд, зикр мешавад, ки онҳое, ки аз ин фармон сарпечӣ мекунанд, бо онҳо бар асоси шариати исломӣ бархӯрд хоҳад шуд.

Дар фармони “Толибон” ҳамчунин омадааст, ки "истеъмолу интиқол, хариду фурӯш, тиҷорат, воридот ва содироту корхонаҳои тавлиди ҳар гуна маводи нашъовар, аз ҷумла шароб, ҳероин, шиша, таблет (таблетка, ҳабҳои равонгардон), чарс (ҳашиш) ва ғайра ба гунаи ҷиддӣ мамнуъ аст".

Дар ҳоле “Толибон” масрафи маводи мухаддирро дар Афғонистон манъ кардаанд, ки бар асоси омори Вазорати тандурустии Афғонистон дар соли гузашта, пеш аз ба қудрат расидани Толибон шумори гирифторони нашъамандӣ (муътодон) дар ин кишвар ба 2,5 миллион нафар мерасад, ки наздик ба 750 ҳазор нафари онҳо занон мебошанд.

Дар Telegram, Facebook, Instagram, OK ва ВК бо мо бимонед.