Пулиси пойтахт дар ду рӯзи охир аз ҳабси 5 фурӯшандаи гӯшт дар бозорҳои шаҳри Душанбе бо иттиҳоми дубора боло бурдани нархи гӯшт ва итоат накардан ба амри пулис иттилоъ дода, гуфтааст, онҳо аз 2 то 5 шабонарӯз ҳабси маъмурӣ шуданд.

Мақомот аз онҳо Ғайраталӣ Алиев, Нуриддин Ҳоҷизода, Далер Ярашев, Мунавваршо Аюбов ва Ҷӯрабек Мусаммиров ном бурда, гуфтааст, қаблан  онҳо барои боло бурдани нархи гӯшт ҷарима шуда буданд.

Ба иддаои мақомот, бо вуҷуди ин “аз кирдори худ (боло бурдани нархи гӯшт, аз идора) даст накашидаанд”.

Манбаъ гуфтааст, дар санҷиши такрорӣ, ҳуқуқвайронкунии дубораи ин фурӯшандагон ошкор шуда, нисбаташон бо моддаи 479-и Кодекси ҳуқуқвайронкунии маъмурӣ бо иттиҳоми “итоат накардан ба амр ва талаботи қонунии корманди пулис” парванда боз шудааст. Мақомот ба онҳо аз 2 то 5 шабонарӯз ҳабси маъмурӣ таъин кардааст.

Назари маҳкумшудаҳо дар робита ба ин қазия ва гуфтаҳои мақомот маълум нест.

Чанде аз фурӯшандаҳои гӯшт, ки ҳабс шуданд.
Акс аз РВКД дар Душанбе

Зоҳиран чунин менамояд, ки дар пайи боло рафтани нархи гӯшт дар бозорҳои пойтахт мақомот барои назорат ва танзими он санҷишҳо мегузаронанд.Чанде пеш пулиси Душанбе дар пайи чанд санҷиш қариб 200 фурӯшандаи бозорҳои пойтахтро бо гумони гарон фурӯхтани гӯшт ҷарима карда буд.

Аз ҷумла, гуфта мешуд, ки 120 фурӯшандаро бар асоси моддаҳои 627 (фиреби истеъмолкунандагон) ва моддаи 555 (худсарона баланд бардоштани нархи махсулот)-и Кодекси ҳуқуқвайронкунии маъмурӣ ҷарима кардаанд.

Миқдори ҷаримаи онҳо гуфта намешуд, вале моддаҳои боло аз 3750 то 7500 ва бештар аз он ҷарима пешбинӣ мекунад.

Дар ҳамин ҳол, маълум нест, ки фурӯшандаҳои гӯшт барои чӣ миқдор зиёд кардани нарх ҷазо дода шуданд. Чунки дар кишвар нархи ягонаи фурӯши гӯшт аз сӯи ҳеҷ ниҳоде мақаррар нашудааст ва ё ҳадди ақал он расонаӣ нагардидааст.

Бархе коршиносон бар ин назаранд, ки дар низоми иқтисоди бозаргонӣ идораи нарх дар бозор бо роҳи маҷбурӣ имконпазир нест ва танҳо бо роҳи пешниҳоди маҳсулоти бештар метавон онро танзим кард.

Дар Telegram, Facebook ва Instagram бо мо бимонед.