Дирӯз, 17-уми апрел бо мақсади “ҳарчи зудтар бартараф намудани оқибатҳои заминҷунбӣ, дастгирӣ ва расонидани кумаки ҳаматарафа ба аҳолии осебдида дар ноҳияҳои Рашту Тоҷикобод” маҷлиси ғайринавбатии ҳукумати кишвар баргузор шуд, хабар медиҳад хадамоти матуботи президент.

Маҷлис таҳти раёсати Эмомалӣ Раҳмон, раисҷумҳури Тоҷикистон баргузор гардида, дар он Сулаймон Зиёзода, муовини сарвазир, ки ҳамзамон раиси Комиссияи ҳукуматӣ оид ба баратарафкунии оқибатҳои заминларза дар ин минтақа аст, инчунин роҳбарони як қатор ниҳодҳо ва раисони ноҳияҳои Рашту Тоҷикобод дар мавриди хисороти заминҷунбӣ гузориш додаанд.

Онҳо дар гузориши худ гуфтаанд, ки дар натиҷаи ин офати табиӣ дар ноҳияҳои Рашту Тоҷикобод 1 нафар ҷон бохта, 16 каси дигар ҷароҳат бардоштаанд.

Ҳамчунин, гуфта шуд, ки дар натиҷаи заминҷунбӣ, дар умум ба 65 хонаи истиқоматӣ пурра, ба 193 хона қисман, ба 150 хона осеби сабук ва ба 193 иншооти ёрирасон, аз ҷумла, 1 беморхонаи, 2 бунгоҳи тиббӣ, 8 мактаб зарар расидааст.

Иттилоъ дода шудааст, ки “корҳо оид ба дақиқ намудани ҳаҷми пурраи хисорот идома дорад”.

1/5

Манбаъ гуфтааст, ки Эмомалӣ Раҳмон баъди гузориши шахсони масъул “барои ҳарчи зудтар ва пурра рафъ намудани оқибатҳои ин заминҷунбӣ, ҳалли мушкилиҳои пешомада ва бо ёриву ғамхории ҳамаҷониба фаро гирифтани аҳолии осебдида ба Комиссияи ҳукуматӣ, мақомоти дахлдор ва раисони ноҳияҳои Рашту Тоҷикобод супоришҳои мушаххас” додааст.

Дастур дода шудааст, ки шахсони масъул дар асоси ҳуҷҷатҳои тасдиқгардидаи комиссияҳо оид ба ҳолатҳои фавқулодаи ноҳияҳои Рашту Тоҷикобод рӯйхати аниқшудаи оилаҳои зарардидаро барои расонидани кумакҳои яквақтаинаи моддӣ пешниҳод намоянд.

 

Президент аз ҷумла, ба ширкати “Тоҷиксуғурта” ва ҳукуматҳои Рашту Тоҷикобод супориш додааст, ки ба ҳар як оилаи аз заминҷунбӣ зарардида, сарфи назар аз мавҷудияти шартномаи суғуртавӣ пул диҳанд.

“Аз мардуми саховатпешаю савобҷӯ, аз ҷумла онҳое, ки маблағҳои зиёди худро барои ҳаҷ ва умра сарф мекунанд, даъват карда шуд, ки хайроту садақоти худро ба расонидани кумак ба зарардидагони ин ва дигар офатҳои табиӣ низ равона созанд”, - менависад хадамоти матбуотии прерзидент.

Ҳамчунин, раиси ҷумҳури кишвар ба ҳукуматҳои ин ду ноҳия дастур додааст, ки барои оилаҳои хонаҳояшон пурра вайроншуда то 1-уми ноябр хонаҳои нав сохта ва ба истифода диҳанд.

Зикр шудааст, ки ба оилаҳои хонаҳояшон вайроншуда барои сохтани манзил замини наздиҳавлигӣ ҷудо карда шуда, “лоиҳаи хонаҳои чорҳуҷрагӣ ва дуҳуҷрагӣ дар муҳлатҳои кутоҳтарин” таҳия карда шавад.

Роҳбари давлат ҳамчунин, аз вазорату идораҳои дахлдор талаб кардааст, ки барои ҳарчи зудтар ба роҳ мондани раванди таълим, ба табобати саривақтӣ фаро гирифтани нафарони ҷароҳатҳои ҷисмонӣ бардошта, назорати қатъии ҳолати санитарию эпидемиологӣ дар минтақаҳои аз офати табиӣ зарардида ва сари вақт таъмин кардани сокинон бо маводи доруворӣ ва дигар лавозимоти тиббӣ, чораҳои қатъӣ андешанд.

Ӯ гуфтааст, ки фаъолияти муассисаҳои таълимӣ ва раванди таълиму тарбияи хонандагон, аз ҷумла дар ҷойҳои муваққатӣ, бояд бемонеа идома ёбад.

Сохторҳои дигар вазифадор шуданд, ки оид ба кӯчонидани аҳолӣ аз мавзеъҳои дорои хавфи баланди сейсмикӣ ноҳияҳои Рашту Тоҷикобод, омӯзиши ҳамаҷонибаи оқибатҳои заминҷунбӣ ва сабабҳои ба вуқуъ омадани онро ба роҳ монда, барои сохтмони ба заминҷунбӣ тобовар дар минтақаи осебдида ба ҳукумати кишвар таклиф пешниҳод намояд.

Ёдрас мешавем, ки дар пайи заминларзаи рӯзи 13-уми апрел дар ноҳияҳои Рашту Тоҷикобод 94 хонаи истиқоматӣ пурра ва 50 хона қисман вайрон шуда, ба 61 хонаи дигар осеби сабук расидааст. Ҳамчунин, гуфта мешавад, ки дар пайи ин офати табиӣ 3 мактаб ва наздики 200 иншооти гуногуни дигар зарар дидаанд. Як кӯдаки сесола ҳам дар натиҷаи ин ҳодиса, зери девор монда ҷон бохтааст.

Дар Telegram, Facebook ва Instagram бо мо бимонед.