Субҳи имрӯз тамоми гузаргоҳҳои марзӣ миёни Тоҷикистону Қирғизистон боз карда мешаванд. Аввали ҳафтаи равон дар ҷаласаи комиссияи байниҳукуматии Тоҷикистону Қирғизистон оид ба таъин ва аломатгузорӣ дар марзи давлатӣ дар Душанбе ҷонибҳо дар ин бора тавофуқ ҳосил карданд.

Тавре ба ОИ «Азия-Плюс» як манбаъ аз ҳукумати ҷумҳурӣ хабар дод, дар ҷаласа ҳамчунин оид ба минбаъд истифода нашудани аслиҳаи оташфишон аз ҷониби нерӯҳои марзбонӣ ва сохторҳои қудратии кишварҳо зимни вазъи ғайримунтазира дар марз низ созиш ба даст омад.

Дар ҷаласаи комиссияи байниҳукуматии Тоҷикистону Қирғизистон оид ба таъин ва аломатгузорӣ дар марзи давлатӣ дар Душанбе оид ба идомаи кори комиссияҳои дахлдори ба эътидол овардани вазъ дар марзи Тоҷикистону Қирғизистон протоколи ҷонибҳо ба имзо расид, ки зери он муовинони нахуствазирони кишварҳо Муродалӣ Алимардон ва Токон Мамитов имзо гузоштанд.

Ҳамчунин дар ҷаласаи пушти дарҳои пӯшида суратгирифта ҷонибҳо дар бораи сохтмони ду пул дар қитъаҳои баҳсноки марз дар самти Исфара низ тавофуқ ҳосил намуданд. Як пулро Тоҷикистон ва пули дигарро Қирғизистон месозанд. Дар бораи ҷузъиёти дигар маълумот дода намешавад.

Ҷонибҳо ҳамчунин дар бораи баргузор намудани даври навбатии шуфтушунидҳо ахири моҳи март дар Тоҷикистон низ ба созиш расиданд. Гуфтушунидҳои навбатӣ дар Душанбе ё Исфара баргузор хоҳанд шуд.

Ёдрас мекунем, ки пас аз муноқишаи мусаллаҳонаи рӯзи 11-уми январ дар марзи давлатии Тоҷикистону Қирғизистон кишвари ҳамсоя якҷониба тамоми гузаргоҳҳои марзӣ бо Тоҷикистонро баста буд.