Яке аз фаъолони ҷомеаи шаҳрвандии ВМКБ ва раиси бахши Ҳизби сотсиал-демократии Тоҷикистон дар Бадахшон Алим Шерзамонов барои бозпурсӣ ба Раёсати КАДАМ-и вилоят даъъват шуд.

Дар мусоҳиба ба «Азия-Плюс» Шерзамонов дар ин робита зикр кард, ки вохӯрӣ бо кормандони КДАМ соати 16-00-и рӯзи 24-уми июн доир гардида, дар он аз ӯ барои тарк накардани қаламрави ВМКБ баёнот гирифтаанд.

«Як рӯз пеш як шахси номаълум ба ман бо телефон занг зада, ба Раёсати КДАМ барои суҳбат даъват кард. Баъдтар дар ҷараёни вохӯрӣ ӯ гуфт, ки даъватнома фиристода шуда, вале ба ман нарасидааст», - иброз дошт Шерзамонов.

Ба савол дар бораи мавзӯи суҳбат дар Раёсати КДАМ Шерзамонов посух дод, ки дар ин бора чизе гуфта наметавонад, зеро дар бораи ифшо накардани маълумот зери санад имзо гузоштааст. «Мутаассифона, дар бораи суҳбат ба шумо чизе гуфта наметавонам, танҳо ҳаминро қайд карданиам, ки дар бораи боздоштшуда ба гумони хиёнат ба давлат Александр Содиқов суҳбат доштем. Ғайр аз ин, ба масъалаи гирдиҳамойиҳо дар Хоруғ низ таваҷҷуҳ зоҳир шуд», - афзуд номбурда.