Дар натиҷаи мавриди тирпарронӣ қарор гирифтани қаламрави мавзеи Бедаки ҷамоати Ворух аз ҷониби марзбонони Қирғизистон ду тан аз марзбонони тоҷик захмӣ шуданд. Дар ин бора ба «Азия-Плюс» аз Сарситоди нерӯҳои марзбонии КДАМ Тоҷикистон хабар доданд.

Ба иттилои манбаъ, як марзбони тоҷик зимни баромадан аз мавқеи ишғолкарда баъди ба сӯи мардуми осоишта тир кушодани марзбонони кишвари ҳамсоя аз пой ва марзбони дигар мустақиман дар мавқеи ишғолкардаи марзбонони тоҷик аз дасташ захмӣ шудааст.

«Марзбонони захмишуда дар беморхонаи шаҳри Исфара бистарӣ буда, ба гуфтаи табибон, вазъи солимии онҳо муътадил аст», - гуфт манбаъ.

Дар ҳамин ҳол, ӯ маълумоти аз ҷониби Қирғизистон интишоршуда дар бораи он ки марзбонони тоҷик зимни мавриди тирпарронӣ қарор додани қаламрави кишвари ҳамсоя аз миномёт истифода кардаанд, қотеъона рад намуд.

«Дар ҷараёни ин ҳодиса марзбонони тоҷик умуман ягон маротиба аз силоҳи оташфишон тир накушоданд, - таъкид доштанд дар Сарситоди Сарраёсати нерӯҳои марзбонии КДАМ Тоҷикистон.

Зимнан зикр гардид, ки айни замон вазъ дар марзи Тоҷикистону Қирғизистон таҳти назорат қарор дошта, роҳи мошингарди Исфара – Ворух баста аст.