Душанбе. 27-уми июл. «Азия-Плюс» — | Соли равон ҳукумати ҷумҳурӣ барои харидани техникаву таҷҳизот ба Кумитаи ҳолатҳои фавкулодда ва мудофиаи гражданӣ наздики 5 млн. сомонӣ маблағ ҷудо кард.

Тавре ба ОИ «Азия-Плюс» аз кумитаи мазкур хабар доданд, дар тӯли фаъолияти кумита бори нахуст ҳукумат ин миқдор маблағи зиёдро ҷудо намудааст. «Дар нимсолаи аввали соли равон бо дастгирии созмонҳои мададрасони хориҷӣ ва ташкилотҳои байнулмилалӣ барои эҳтиёҷоти кумита ба маблағи ҳудуди 430 ҳазор Евро техникаву таҷҳизот дастрас гардид», - гуфтанд дар кумита.

Ҳамчунин зикр гардид, ки кумита ба ҳукумат пешниҳод кардааст, ки хадамоти ҳифз аз жолаи Кумитаи ҳифзи муҳити зист ба тобеъияти КҲФ ва МГ гузаронида шавад ва айни замон ин пешниҳод мавриди баррасии вазорату идораҳои дахлдор қарор дорад. «Гап сари он аст, ки вазифаҳои ба дӯш доштаи ин хадамот бештар ба чораҳои меандешида зимни ҳолатҳои фавқулодда мувофиқанд», - афзуд манбаъ.