Мақомоти шаҳрдории Душанбе аз сокинони пойтахт даъват ба амал овард, ки нисбат ба мушкилоти ҳаракати нақлиёти мусофирбар дар хатсайрҳои дохилишаҳрии № 1, 2, 12, 22 ва 37 бо дарки фаҳмишу масъулият муносибат намоянд.

Тавре ба ОИ «Азия-Плюс» котиби матбуотии раиси шаҳри Душанбе Шавкат Саидов хабар дод, мушкилоти ҳаракати нақлиёт дар хатсайрҳои зикршуда бинобар сабаби қатъи интиқоли газ аз Ӯзбекистон рӯйи кор омадааст.

Ба гуфтаи вай, дар пойтахт ба ҳамлу нақли мусофирон беш аз 100 адад нақлиёте, ки ба сифати сӯзишворӣ газро истифода мекунанд, машғул мебошанд.

«Бо назардошти вазъи баамаломада, сохторҳои дахлдори мақомоти шаҳрдорӣ кӯшиш ба харҷ медиҳанд, ки камбуди шумори нақлиёти мусофирбареро, ки бо газ кор мекунанд, ба дигар воситаҳои нақлиёт, ки бо маводи сӯзишвории навъи дигар кор мекунанд, иваз намоянд», - таъкид кард Саидов.

Ӯ ҳамчунин итминон дод, ки мушкилоти муваққатӣ дар ҳаракати нақлиёти мусофирбари пойтахт дар рӯзҳои наздиктарин роҳи ҳалли худро пайдо хоҳад кард.