Шурӯъ аз 11-уми январи соли ҷорӣ боз як микрорайони манзилҳои зисти баландошёнаи шаҳри Кӯлоб бо гази табиӣ таъмин карда шуд.

Тавре ба ОИ «Азия-Плюс» муовини раиси шаҳри Кӯлоб Рустам Неъматов хабар дод, бо ду баробар афзоиш ёфтани интиқоли газ аз ноҳияи Балҷувон ин кор муяссар гардидааст.

«Иттиҳодияи ҷамъиятии «Ҳасан-К» якчанд чоҳҳоро барқарор намуда, ҳаҷми интиқоли гази табиӣ ба шаҳри Кӯлобро аз 4,5 то 10 ҳазор метри мукааб дар як шабонарӯз афзуд», - гуфт муовини раиси шаҳр ва илова кард, ки бо назардошти вақти қатъи барқ реҷаи интиқоли газ ба се микрорайон тартиб дода шудааст, то ки соҳибхоназанон тавонанд дар ин вақт аз газ истифода намоянд.

Ба қавли Неъматов, бо гармшавии обуҳаво қисмате аз ҳаҷми газ ба корхонаи истеҳсоли хишти шаҳри Кӯлоб фиристода мешавад.