Раисҷумҳури Тоҷикистон имрӯз, 26-уми декабр зимни ироаи паёми солонааш ба порлумон аз он изҳори нигаронӣ кард, ки дар тамоми соҳаҳои кишвар ихтироъкор, соҳибкор, ҳунарманд ва донишманд намерасад.

Ба гуфтаи Эмомалӣ Раҳмон, роҳбарону кормандони соҳаи маорифро зарур аст, ки назорати азхудкунии донишҳои замонавиро пурзӯр гардонида, наврасону ҷавононро ба мутолиаи китобҳои бадеиву илмӣ ташвиқ намоянд, қобилияти эҷодии онҳоро тақвият бахшанд ва ба таълими фанҳои табиатшиносӣ, дақиқ ва риёзӣ таваҷҷуҳи бештар зоҳир намоянд.

Вобаста ба ин сарвари давлат пешниҳод кард, ки ба хотири боз ҳам беҳтар ба роҳ мондани омӯзиши илмҳои табиатшиносӣ, дақиқ ва риёзӣ, инчунин, барои тавсеаи тафаккури техникии насли наврас солҳои 2020 -2040 “Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф” эълон карда шаванд.

Вазорати маориф ва илм, Академияи илмҳо ва дигар вазорату идораҳое, ки дар сохторашон муассисаҳои таълимӣ доранд, вазифадор карда шуданд, ки нақшаи чорабиниҳоро доир ба ин масъала дар муҳлати се моҳ ба ҳукумати мамлакат пешниҳод кунанд.

“Сифати таълимро бояд беҳтар гардонем. Агар ҳамин хел рафтан гирем, сухангӯю сухандон хеле зиёд мешаванд. Лекин ихтироъкор, соҳибкор, ҳунарманд, донишманд дар тамоми соҳаҳо намерасад. Минбаъд ҳимоя кардани рисолаҳои номзадию докторию академикиву дигарро аз нав бознигарӣ кардан даркор. Системаи Академияи улуми Тоҷикистонро аз нав дида баромадан даркор. Тамоми қолабҳои куҳнаро шикастан даркор”, - гуфт раисҷумҳур.
Вай инчунин пешниҳод кард, ки ҳамасола олимпиадаҳои ҷумҳуриявӣ, вилоятӣ, шаҳрӣ ва ноҳиявиро оид ба илмҳои табиатшиносӣ, дақиқ ва риёзӣ дар ҳамаи зинаҳои таҳсилот баргузор намуда, ғолибони озмунҳо аз ҷониби вазорату идораҳо, мақомоти иҷроияи ҳокимияти давлатии вилоятҳо ва шаҳру ноҳияҳо аз лиҳози моддиву маънавӣ қадрдонӣ ва ҳавасманд гардонида шаванд.
“Сахтӣ накунед! Наврасону ҷавононро дар мактаб ва муассисаи таълимӣ бо тамоми роҳҳо бояд ҳавасманд кард”, - афзуд президент.
Акс аз хадамоти матбуоти сарвари давлат

Ба қавли ӯ, мардуми мамлакат барои иҷрои ниёзҳои динии худ дар як муддати кӯтоҳи соҳибистиқлолӣ зиёда аз 5 ҳазор масҷид бунёд карданд.

“Акнун вақти он расидааст, ки маъракаи бунёди мактабҳо ва боғчаву кӯдакистонҳоро вусъат бахшида, дар ин кори хайр ҳама якҷо саъю талош кунем ва саҳми худро барои ояндаи давлату миллат гузорем, яъне ғами фарзандонамонро хӯрем. Ислоҳи ин мушкилоти ҷомеа, ки давлат ба он афзалият медиҳад, вазифаи ҳар як сокини бонангу номус ва боиродаву ватандӯст ба ҳисоб меравад ва бовар дорам, ки ин кори хайру савоб аз ҷониби аҳли ҷомеа дастгирӣ меёбад”, - иброз дошт Эмомалӣ Раҳмон.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.