Ин шом имомхатиби масҷиди “Мир Саид Алии Ҳамадонӣ”, маъруф ба “Мехкалона” дар шаҳри Душанбе эълон кардааст, ки барои пешгирии эҳтимоли паҳншавии коронавирус, намозгузорон аз омадан ба масҷид худдорӣ кунанд. Аммо намояндаи Кумитаи дин мегӯяд, то ҳол чунин дастури расмӣ нест.

Яке аз намозгузорон Шералӣ Давлатов ба хабарнигори “Азия-Плюс” гуфт, ки имомхатиб ин эълонро дар намози хуфтан ба мардум ироа кардааст.

“Имомхатиби масҷиди “Мехкалона” Ҳикматулло Ризоев дар намози хуфтан эълон кард, ки аз бомдоди рӯзи 4-уми март барои пешгирии эҳтимоли паҳншавии коронавирус, дари масҷидҳо дар шаҳри Душанбе муваққатан баста мешаванд ва намозгузорон аз омадан ба масҷид худдорӣ кунанд”, - гуфт Шералӣ Давлатов.

Аммо котиби матбуотии Кумитаи дин, танзими анъана ва ҷашну маросими назди Ҳукумати ҶТ Афшин Муқим ба хабарнигори “Азия-Плюс” гуфт, ки то ҳол чунин дастури расмӣ нест.

“Намоз дар масоҷид манъ нашудааст, овозаҳо асос надоранд. Шояд дар ҷое нофаҳмие шуда бошад, аммо дар ҳамаи масоҷиди кишвар намоз тибқи тартиб ҷараён мегирад”, - изҳор дошт Афшин Муқим.

Қобили зикр аст, ки вазири тандурустӣ ва ҳифзи иҷтимоии аҳолии Тоҷикистон Насим Олимзода рӯзи 2-юми март дар ҷаласаи Ситоди ҷумҳуриявӣ оид ба пешгирии сирояти коронавирус ва интиқоли он ба ҷумҳурӣ гуфтааст, ки масъулин ҷиҳати пешгирии сирояти коронавирус миёни аҳолӣ: ҷойҳои серодам, бозорҳо, масҷид, тӯю маъракаҳо ва риояи гигиенаи шахсӣ бояд тадбирҳои мушаххас андешанд.

Муовини сарвазир Ширин Исматуллозода дар ин ҷаласаи Ситод иброз дошт, ки то имрӯз ягон ҳолати сирояти коронавирус дар байни шаҳрвандони Тоҷикистон ва шаҳрвандони дигар кишварҳо, ки дар моҳҳои охир ба қаламрави Тоҷикистон ворид гардидаанд, ба қайд гирифта нашудааст.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.