Дар Театри ҷавонони ба номи Маҳмудҷон Воҳидов 11-уми март бахшида ба Рӯзи матбуоти тоҷик чорабинии тантанавӣ баргузор шу. Дар он беҳтарин намояндагони ин касб қадршиносӣ ва беҳтарин ВАО-и кишвар эълон гардиданд.

Сардори маркази матбуоти Вазорати маориф ва илми ҷумҳурӣ Эҳсон Хушбахт дар бахши матбуоти даврӣ, директори намояндагии миллии Ширкати байнидавлатии симо ва садои «Мир» Вера Исмоилова – дар бахши телевизион ва сармуҳаррири Радиои «Овози тоҷик» Фазилат  Иброҳимова – дар бахши радио ба ҷоизаи Иттифоқи журналистони Тоҷикистон ба номи Лоҳутӣ сазовор дониста шуданд.

Мувофиқи натиҷаҳои назарпурсии хонандагону шунавандагон ва тамошобинони телевизион, нашрияи “Ҷумҳурият”-ро Иттифоқи журналистони Тоҷикистон “рӯзномаи сол” эълон кард.

Хабаргузории “Авеста” – беҳтарин оҷонсӣ, “Радиои Ватан” – беҳтарин радио, “Синамо” – беҳтарин шабакаи телевизион ва “Бонувон” – беҳтарин маҷаллаи сол эътироф шуданд.

Сардабири нашрияи ҳизбии “Минбари халқ” Бахтиёр Ҳамдамов бо ҷоизаи беҳтарин сармуҳаррир ва Абдулло Раҳнамо бо мукофоти беҳтарин коршинос қадрдонӣ шуданд.

Маркази матбуоти Бонки миллии Тоҷикистон “беҳтарин маркази матбуот”-и сол номида шуд.

Рӯзноманигор ва шоир Валиҷон Баёнӣ, ки охири моҳи феврал аз олам даргузашт, журналисти сол эълон шуд. Ӯ солҳои зиёд дар нашрияи “Ҷавонони Тоҷикистон” ва солҳои охир дар Китобхонаи миллии Тоҷикистн кор мекард.

Кумитаи ҳолатҳои фавқулода ва мудофиаи граждании назди ҳукумати Тоҷикистон ба гурӯҳи расонаҳои “Азия-Плюс” номаи сипосгузорӣ тақдим кард.

Рӯзи матбуоти тоҷик ҳамасола 11-уми март дар кишвар таҷлил мешавад. Соли 1912 аввалин шумораи “Бухорои Шариф” маҳз дар ҳамин рӯз чоп шудааст.

Дар ин матлаб навиштаҳои соҳибкасбони шинохта перомуни вазъи кунунии рӯзноманигории Тоҷикистон аз сафаҳоти фейсбукии онҳо бознашр шудааст.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.