Ширкати ҳавопаймоии fly Dubai  анҷоми парвозҳо дар ду хатсайр - рӯзи шанбе аз Душанбе ба Дубай ва рӯзи ҷумъа аз Дубай ба Душанберо бекор кард. Акнун парвоз тариқи ин хатсайр дар як ҳафта як маротиба - рӯзи сешанбе аз Дубай ба Душанбе ва рӯзи чоршанбе бозпас анҷом дода мешавад, хабар дод ба “Азия-Плюс” директори Агентии авиатсияи граждании Тоҷикистон Икром Субҳонзода.

“Ситоди ҷумҳуриявии муқовимат бо коронавирус бо мақсади пешгирии паҳншавӣ ва хуруҷи мавҷи дуюми сироят, ки айни замон дар саросари дунё ба мушоҳида мерасад, чунин тасмим гирифт”, - изҳор дошт ӯ.

Ба гуфтаи ӯ, ин тасмим муваққатӣ аст ва бо ба эътидол омадани вазъ қарор бекор шуда, парвозҳо бо ҷадвали пешина анҷом дода мешаванд.

Дар ҳамин ҳол, зикр шуд, ки як парвоз аз ҷониби ширкати “Сомон Эйр” ва парвози дуюм аз ҷониби ширкати fly Dubai иҷро карда мешавад.

Хатсайри Душанбе-Урумчӣ кай барқарор мешавад?

Икром Субҳонзода ҳамчунин дар бораи барқарор шудани хатсайри ҳавоии мунтазам байни Тоҷикистону Чин изҳори назар кард.

“Тоҷикистон ба барқарор намудани парвозҳо омода аст ва Чинро дар ин бора огаҳ кард. Мо намояндаи ширкати ҳавопаймоии «China Southern Airlines»-и Чинро даъват карда, омодагиамонро ба барқарор кардани парвозҳо изҳор ва барои иҷрои 1 парвоз дар 1 ҳафта иҷоза додем. Пешниҳоди мо то ҳол аз ҷониби Чин баррасӣ мешавад”, - қайд кард Икромзода.

Субҳонзода изҳор дошт, ки Тоҷикистон ба иҷрои парвоз бо хатсайри Душанбе-Тошканд низ омода буда, тасмими Ӯзбекистонро дар ин масъала интизор аст.

Зимнан зикр шуд, ки масъалаи барқарор намудани алоқаи мунтазами ҳавоӣ бо Русия то ҳанӯз мавриди баррасӣ қарор дорад.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.