Вазири фарҳанги ҷумҳурӣ Зулфия Давлатзода масъалаи баргузории Намоишгоҳи нигораҳои таърихии Тоҷикистон дар Осорхонаи Гиймеи Фаронсаро дар мулоқоташ бо сафири Фаронса дар Тоҷикистон Мишел Тарранро баррасӣ кардааст.

Тавре ки дафтари матбуоти Вазорати фарҳанг иттилоъ медиҳад, зимни вохӯрӣ эълон шуд, ки соли ҷорӣ баргузории Намоишгоҳи нигораҳои таърихии Тоҷикистон дар Осорхонаи Гиймеи Фаронса таҳти унвони “Тоҷикистон - кишвари дарёҳои тиллоӣ” аз 13 октябри соли 2021 то 10 январи соли 2022 ба нақша гирифта шудааст.

Гуфта мешавад, алакай дар мавриди баргузории он аз ҷониби мудирони Осорхонаи Гийме, Осорхонаи миллии Тоҷикистон ва Осорхонаи Институти таърих, бостоншиносӣ ва мардумшиносии Академияи миллии илмҳои Тоҷикистон шартнома ба имзо расидааст.

Ба иттилои манбаъ, айни замон омодагӣ барои баргузории ин намоишгоҳ аз ҷониби Тоҷикистон идома дорад.

Дар навбати худ Мишел Тарран изҳор дошт, ки намоишгоҳ яке аз аввалин намоишгоҳҳои Тоҷикистон дар кишварҳои Аврупо мебошад, зеро ин намоишгоҳ дар он ҷо фарҳанг ва таърихи ғании миллати тоҷикро муаррифӣ менамояд.

“Намоишгоҳи мазкур дар замони хеле мувофиқ баргузор мегардад, зеро дар ин муддат дар кишвари мо истироҳатҳои идона хеле зиёд ҳастанд, ки ин сафи тамошобинони фаронсавӣ ва сайёҳони хориҷиро зиёд хоҳад кард”, - таъкид намуд сафир.

Зимни мулоқот зикр шуд, ки корҳои омодагӣ ба ин намоишгоҳ дар Осорхонаи Гийме идома дошта, инчунин қобили қабул хоҳад буд, ки дар ҳошияи намоишгоҳи мазкур дар Осорхонаи Гийме намоишгоҳи дигар дастовардҳои Тоҷикистон, аз ҷумла, зарфиятҳои сайёҳӣ, фарҳангӣ, рассомӣ, китобҳо, театру мусиқӣ ва ғайра ташкил карда шавад.

Қобили зикр аст, ки бар асари пандемияи коронавирус баргузории ин намоишгоҳ ба вақти дигар мавқуф гузошта шуда буд. Нахуст Тоҷикистону Фаронса ният доштанд, ки намоишгоҳро аз 4 ноябри соли 2019 то 17 феврали соли 2020 баргузор кунанд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.