Муовини раиси Шӯрои амнияти Русия Дмитрий Медведев изҳор намудааст, ки механизмҳои ҳуқуқии танзимгари реҷаи будубоши муҳоҷирон бозбинӣ мехоҳанд. Дар ин бора хабаргузории ТАСС иттилоъ медиҳад.

Лоиҳаи қонуне, ки дар он роҳандозии феҳристи ягонаи кормандони хориҷии ҷалбшуда ва корфармоҳои онҳо пешбинӣ мегардад, барои пешниҳод ба парлумон омода мешавад.

“Механизмҳои ҳуқуқии танзимгари реҷаи будубоши муҳоҷирон дар Русия бозбинӣ мехоҳанд. Дар қонуни федералӣ, ки барои пешниҳод ба парлумон омода мешавад, роҳандозии феҳристи ягонаи кормандони хориҷии ҷалбшуда ва корфармоҳои онҳо пешбинӣ шудааст”, - изҳор доштааст Медведев зимни ҷаласаи Комиссияи байниидоравӣ оид ба масоили такмили сиёсати давлатии муҳоҷират.

Ӯ шарҳ додааст, ки ин иқдом ба бештар шаффофу муассир гардидани расмиёт ва механизмҳо дар ин соҳа, инчунин муборизаи пурсамар дар бозори пасипардагии хидматрасониҳо дар соҳаи мазкур имкон медиҳад. Ин далелҳо ҳоло ҳам зиёданд. Мо дар яке аз маҷлисхои худ дар ин бора сухан ронда будем: дар шароити ҳозира он ҳатто меафзояд”, - гуфтааст вай.

Бино ба арзёбии ӯ, муҳим он аст, ки ҳамаи сохторҳои давлатӣ ва хадамоти соҳавӣ ба ҷорисозии модели чунин феҳрист омода бошанд. «Он гоҳ мо ҳадди ақалл тасаввуроти равшане хоҳем дошт, ки кӣ дар куҷо кор мекунад, бақайдгирӣ чӣ гуна сурат мегирад, кӣ дар куҷосту ба куҷо меравад ва ғайра”, - иброз доштааст ӯ.

Медведев зикр кардааст, ки аз номуайянӣ дар раванди муҳоҷират афроде истифода мекунанд, ки дар соҳаи муҳоҷират ба тиҷорати ғайриқонунӣ машғуланд ва ё худашон мехоҳанд ба Русия ғайриқонунӣ ворид шаванд.

“Аз ин рӯ, ҳамаи ин маълумоти феҳрист бояд барои ҳадафҳои худ хизмат кунанду мавриди амал қарор гиранд. Ва баробари таъсис, бояд истифода аз ин феҳристҳо ба роҳ монда шавад. Агар зарур бошад, табиист, ки ба лоиҳаи қонун низ тағйирот ворид шавад”, - илова кардааст Медведев.

Дар Telegram, Facebook, Instagram, OK ва ВК бо мо бимонед.

Лутфан, хабари муҳим, суол ва аксу видеоҳои ҷолибро ба Asia-Plus тавассути Viber, Telegram, Whatsapp, Imo ба рақами +992 93 792 42 45 фиристед.