Вазири корҳои хориҷии Русия Сергей Лавров рӯзи 1 ноябр дар мусоҳиба ба шабакаи телевизиони “Россия 24” изҳор намудааст, ки “Толибон” бо сабаби таъхири хуруҷи неруҳои низомии ИМА аз Афғонистон худро озод аз иҷрои уҳдадориҳо мешуморанд.

“Тибқи арзёбии чанде аз сиёсатшиносони амрикоӣ, бо сабаби дар муҳлати мувофиқашуда аз уҳдаи хориҷ кардани неруҳо набаромадани ИМА, ҳамин ҳолат ба вуҷуд омад”, - овардааст гуфтаҳои Лавровро хабаргузории "Красная весна".

Ба гуфтаи вай, толибон “худро аз уҳдадории таъсиси як ҳукумати ризоияти миллӣ озод донистанд”.

Дар ҳамин ҳол ИМА, ба гуфтаи Лавров, ноуҳдабароёна амал карда, кӯшиш мекард, ки тарафҳои даргирро дар Афғонистон ба созиш биорад.

“Гуфта метавонам, ки ин кор начандон уҳдабароёна сурат гирифт. Арзёбии худро пинҳон намедорам”, - иброз дошт ӯ.

Вазир инчунин дар таъхири хурӯҷи нерӯҳои хориҷӣ аз Афғонистон, аз ҷумла Ашраф Ғанӣ, раисҷумҳури собиқи ин кишварро низ масъул медонад, ки ба гуфтаи ӯ, аз Созишномаи сулҳи Давҳа норозӣ буд ва ба иҷрои он монеъ мешуд.

"Ғанӣ дарк мекард, ки дар ҳама гуна сенария ӯ шахси аввал дар ҳукумати нави Афғонистон боқӣ намемонад. Аз ин рӯ, ӯ ҳама корро кард, ки ин равандро бо ҳар васила ба таъхир андозад. Дар натиҷа амрикоиҳо таъхир карданд", - гуфт вазир.

Ҳар он чи дар Афғонистон рух медиҳад, метавонед мустақиман дар сужаи мо -  "Афғонистон" бихонед.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.