Артиши Исроил давоми якшабонарӯзи ахир дар навори Ғазза бузургтарин талафотро аз оғози амалиёти заминӣ алайҳи гуруҳи “Ҳамос” дидааст.

Бино ба охирин маълумоти фармондеҳии Исроил, дар якшабонарӯзи ахир 24 низомии ин кишвар кушта шудааст.

Намояндаи артиши Исроил Даниэл Ҳагарӣ гуфт, дар натиҷаи таркиш дар ду биное, ки онҷо низомиёни ин кишвар қарор доштанд, 21 кас ҷон бохтааст. Ҳамчунин як тонки Исроил ҳадафи тири гранатомёт қарор гирифтааст.

Президенти Исроил Исҳоқ Ҳерзог ба наздикони кушташудаҳо ҳамдардӣ баён кардааст.

“Имрӯз субҳи сахте буд”, - навиштааст ӯ.

Задухӯрдҳои шадид миёни Исроил ва гуруҳи “Ҳамос”, ки дар Амрико ва Иттиҳоди Аврупо “созмони террористӣ” эълом шудааст, дар шаҳри Хонюнис, дар ҷанубу ғарби Ғазза идома доранд. Бино ба хабарҳо, нерӯҳои асосии “Ҳамос” асосан дар онҷо ҳастанд.

Ҷанги Ғазза баъд аз он шуруъ шуд, ки ҷангҷӯёни гурӯҳи “Ҳамос” рӯзи 7-уми октябри соли гузашта ба Исроил ҳамла карда, тақрибан 1200 исроилиро куштанд ва бештар аз 240 каси дигарро гаравгон гирифтанд. Дар ҳамлаҳои интиқомҷӯёнаи Исроил то кунун, ба гуфтаи мақомоти Ғазза, тақрибан 25 ҳазор фаластинӣ кушта шудаанд, ки 70 дар сади онҳоро занону кӯдакон ташкил медиҳанд.

Дар Telegram, Facebook, Instagram, OK ва ВК бо мо бимонед.