Бо қарори Шӯрои уламои Тоҷикистон имсол дар Тоҷикистон Иди саиди Фитр санаи 26 июн ҷашн гирифта мешавад.

Раиси Шӯрои уламои Маркази исломии Тоҷикистон Саидмукаррам Абдулқодирзода хабар дод, ки санаи Иди Рамазонро имрӯз Шӯрои уламои Тоҷикистон иборат аз 25 нафар ходимони дин тасдиқ кардааст.

Ёдрас мекунем, ки имсол моҳи шарифи Рамазон дар Тоҷикистон аз 27 май шурӯъ гардида буд. Рӯзадорӣ дар ин моҳи шариф яке аз панҷ рукнҳои ислом аст. Парҳезгорӣ қариб дар ҳамаи динҳо дунё вуҷуд дорад. Ҳадафи ин навъи ибодат дар дини ислом ҳарчи бештар наздикшавӣ ба Худо маънидод мешавад.

Моҳи шарифи Рамазон аз моҳҳои солшумории ҳиҷрии қамарӣ шуморида мешавад. Мусулмонон дар ин моҳ рӯза гирифта, бештар ба ибодат ва қироати Қуръон машғул мешаванд.

Рӯзи ид баъд аз супурдани фитри рӯза ва адои намози идона, мардум ба зиёрати хешовандону наздикон ва иддае барои фотеҳахонӣ сари мадфани гузаштагони худ мераванд. Баҳри пешвози меҳмонон дар хонаводаҳо дастурхони идона густурда шуда, кӯдакон низ бо табрикот ба хонаҳо мераванд ва ба онҳо дастовезҳои идона дода мешавад.

Қобили зикр аст, ки соли равон маблағи закот (андози ҳатмии солона ба фоидаи камбизоатон)-ро мусалмононе месупоранд, ки на камтар аз 22 ҳазору 950 сомонӣ воситаҳои зиёдатӣ доранд. Аз ин маблағ онҳо бояд 575 сомонӣ хайр кунанд.

Садақаи фитр мувофиқи меъёри шаръӣ ба ҳисоби гандум 5 сомонӣ ва ба ҳисоби мавиз 48 сомонӣ (барои шахсоне, ки тавоноии молии бештар доранд) барои 1 моҳ ба 1 нафар муайян карда шудааст.

Фидяи савм барои соҳибони узри шаръӣ (касоне, ки имкони рӯзагирӣ надоранд), 300 сомонӣ мукаррар шудааст, яъне ин афрод ҳар рӯзи моҳи рамазон бояд 10 сомонӣ хайрия диҳанд.

Мутобиқи қонуни ҶТ «Дар бораи рӯзҳои ид», Иди Рамазон рӯзи истироҳат эълон шудааст. Имсол иди анҷоми моҳи шарифи Рамазон дар Тоҷикистон ба рӯзи душанбеи ҳафта, 26 июн рост меояд. Рӯзи дигар низ дар Тоҷикистон ид аст. Санаи 27 июн дар ҷумҳурӣ Рӯзи ваҳдати миллӣ ҷашн гирифта мешавад.

Ҳамин тариқ, бо назардошти ду рӯзи истироҳати ҳафта - 24 ва 25 июн, тоҷикистониён имсол пайдарҳам 4 рӯз аз 24 то 27  - рӯзҳои шанбе, якшанбе, душане ва сешанбеи ҳафта июн истироҳат мекунанд.

Кумитаи умури дини ҷумҳурӣ изҳор дошт, ки  доир ба оростани дастурхону идгардаки кӯдакон ҳеҷ маҳдудияте ҷорӣ нашуда, танҳо тавсия дода шудааст, ки ба зиёдаравӣ роҳ надода, кӯдакон бештар зери назорат қарор дошта бошанд.

Хабарҳои моро дар Telegram пайгирӣ намоед, ба шабакаи мо бо суроғаи  https://t.me/asiaplus  ҳамроҳ шавед.