Кумитаи давлатии сармоягузорӣ ва идораи амволи давлатии Тоҷикистон то ҳол биноҳои асосии “Тоҷиксодиротбонк”-у “Агроинвестбонк”, ду бонки пурмоҷаро ва муфлисшуда дар Тоҷикистон ва меҳмонхонаи маъруфи “Тоҷикистон”-ро нафурӯхтааст.

Қаблан, дар як музояда нархи ибтидоии бинои асосии “Тоҷиксодиротбонк” ҳудуди 12 миллион доллар ё 125 миллиону 265 ҳазору 630 сомонӣ ва бинои меҳмонхонаи “Тоҷикистон”, наздики 25 миллион доллар ё 225 миллиону 285 ҳазору 624 сомонӣ муайян шуда буд. Маълум нест, ки нархи ибтидоии бинои асосии “Агроинвсетбонк” чӣ қадар муқарар шудааст.

Саъдӣ Қодирзода, раиси кумитаи сармоягузорӣ, имрӯз, 1 август дар нишасти матбуотӣ сабаби то ба ҳол ба фурӯш нарафтани ин биноҳоро таваҷҷуҳи ками харидорон ба онҳо арзёбӣ кард.

“Дар нимаи аввали соли 2022 аз ҳисоби хусусигардонии амволи давлатӣ ба буҷет 12,1 миллион сомонӣ ворид шуд. Мутаассифона, ба харидории биноҳои «Агроинвестбонк», «Тоҷисодиротбонк» ва меҳмонхонаи «Тоҷикистон» таваҷҷуҳ хеле кам аст. Дар 19 музояда як қисми молу мулкашон ба фурӯш рафтааст, вале ба чизҳои дигар харидор нест. Мо корро дар ин самт идома дода истодаем,-гуфт Қодирзода.

Ин масъули давлатӣ афзуд, ду роҳи ҳалли ин масъала мавҷуд аст: яке фурӯши ин биноҳо, ки то ба ҳол харидор пайдо нашудааст, дуввум, ба иҷора додани ин биноҳо.

Гуфта мешавад, ки масъули музоядаи бинои асосии “Тоҷиксодиротбонк”-у “Агроинвестбонк” ва меҳмонхонаи “Тоҷикистон” раёсати фурӯши амволи давлатии Кумитаи сармоягузорӣ ва идораи амволи давлатии Тоҷикистон буда, он 25-уми майи соли равон нашр шудааст.

Тариқи музояда ба фурӯш гузоштани бинои асосии ду бонки пурмоҷаро ва меҳмонхонаи маъруф дар кишвар дар ҳолест, ки  21 майи соли 2021 Бонки милии Тоҷикистон иҷозатномаи фаъолияти ин ду бонкро бозхонда, бо ҳукми додгоҳ барои фурӯши амвол ва дороиҳои он мудири муваққат таъин шуд.

Гуфта мешавад, ки фурӯши бинои асосии бонкҳо ва меҳмонхонаи “Тоҷикистон”, ки дороиҳои ин бонкҳо гуфта мешавад, дар доираи фурӯши амвол ва дороиҳои бонкҳо сурат мегирад ва маблағи он барои пардохти қарзӣ муштариён сарф мешавад.

Моҳи декабри соли 2021 дар поёни як ҷаласаи парлумони раиси Бонки милии Тоҷикистон Ҳоким Холиқзода дар ҳузури рӯзноманигорон гуфта буд, ки “Тоҷиксодиротбонк” 70 дарсади амонати муштариёнашонро баргардониданд.

Теъдоди умуми амонтагузорони “Тоҷиксодиротбонк” 5,5 ҳазор нафарро ташкил медиҳад. Ҳафт сол пеш “Агроинвестбонк” ва “Тоҷиксодиротбонк” қариб нисфи бозори бонкии кишварро ишғол мекарданд.

Дар Telegram, Facebook, Instagram, OK ва ВК бо мо бимонед.