Дар иҷлосияи ғайринавбатии Маҷлиси миллии Маҷлиси Олии ҶТ имрӯз номзадии Прокурори генералии Тоҷикистон баррасӣ шуд. Аъзои палатаи болоии парлумон барои таъини дубораи Юсуф Раҳмон ба ин вазифа ризоият доданд.

Иҷлосияи ғайринавбатии Маҷлиси миллӣ бо фармони раисҷумҳур Эмомалӣ Раҳмон гузаронида шуд.

Мутобиқи моддаи 56 қисми 4-и Конститутсияи ҶТ, ризоият барои таъин ва озод намудани Прокурори генералӣ ва муовинони ӯ дар салоҳияти Маҷлиси миллӣ мебошад.

Генерал-полковники адлия Юсуф Раҳмон аз 23-юми январи соли 2015 дар вазифаи Прокурори генералии ҶТ фаъолият карда, акнун ваколатҳои ӯ барои 5 соли оянда тамдид шудааст.

Ҳасби ҳол: Раҳмон Юсуф Аҳмадзод 22-юми марти соли 1966 дар ноҳияи Восеъи вилояти Хатлон таваллуд шудааст. Миллаташ тоҷик.

Соли 1991 факултети ҳуқуқшиносии Донишгоҳи давлатии Тоҷикистон ба номи В.И.Ленинро хатм кардааст.

Аз июли соли 1991 – муфаттиши прокуратураи ноҳияи Марказии шаҳри Душанбе.

Аз августи соли 1992 – муфаттиши калони прокуратураи ноҳияи Марказии шаҳри Душанбе.

Аз феврали соли 1993 – муфаттиш оид ба корҳои махсусан муҳими Прокуратураи генералии ҶТ.

Аз ноябри соли 1993 – муфаттиши калон оид ба корҳои махсусан муҳими Прокуратураи генералии ҶТ.

Аз декабри соли 1995 – прокурори ҳарбии гарнизони Душанбе.

Аз феврали соли 1997 – муовини сардори Раёсат – сардори шуъбаи тафтишотии Сарпрокуратураи ҳарбии ҶТ.

Аз октябри соли 1998 – Прокурори ноҳияи Исмоили Сомонии шаҳри Душанбе.

Аз июни соли 2002 – Прокурори ноҳияи Синои шаҳри Душанбе.

Аз феврали соли 2004 – муовини Прокурори генералӣ – Сарпрокурори ҳарбии ҶТ.

Аз 5-уми марти соли 2010 то 30-юми январи соли 2012 – Прокурори вилояти Суғд.

Аз 30-юми январи соли 2012 то 14-уми декабри соли 2014 – сардори шуъбаи бехатарии ҷамъиятии Дастгоҳи Шӯрои амнияти ҶТ.

Аз 14-уми декабри соли 2014 то 23-юми январи соли 2015 – муовини якуми роҳбари Дастгоҳи иҷроияи Президенти ҶТ.

Донандаи забонҳои тоҷикӣ, русӣ ва англисӣ. Оиладор, соҳиби 5 фарзанд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.