Дар маросими муаррифии гузориши Бонки ҷаҳонӣ доир ба масъалаҳои таъмини оби нӯшокӣ сардори Раёсати сиёсати обӣ-энергетикии Вазорати энергетика ва захираҳои оби Тоҷикистон Далер Холматов изҳор кард, ки таъмини аҳолии Тоҷикистон бо оби тозаи ошомиданӣ дар сатҳи паст қарор дошта, танҳо 58%-и аҳолӣ ба оби нӯшокии бехатар дастрасӣ доранд.

Мутахассисони Бонки ҷаҳонӣ таъкид кардаанд, ки «таркиби оби ошомиданӣ дар Тоҷикистон аз бактерияҳои колиформӣ иборат буда, сифати таъмаш паст аст».

Намояндагони Тоҷикистон қайд карданд, ки дар ин самт барқарор кардани зербино зарур аст, ки барои ин воситаҳои хеле зиёд лозиманд.

«Беш аз 70%-и зербинои таъмини об бо шумули зербинои шаҳрӣ фарсуда шуда, ба барқарор кардан ва азнавсозӣ ниёз дорад, - гуфт Далер Холматов. - Ҳамаи ин ба бадшавии сифати об мусоидат намуда, ба солимии аҳолӣ хатари ҷиддӣ эҷод мекунад».

Номбурда зикр кард, ки соҳаи таъминот бо об ва санитария барои давлат яке аз самтҳои афзалиятнок ба шумор рафта, ҳаллу фасли мушкилот дар ин бахш вазифаи аввалиндараҷа шуморида мешавад.

Муовини аввали роҳбари КВД «Хоҷагии манзилию коммуналӣ» Равшан Тӯйчизода қайд кард, ки барои барқарор кардани низоми таъминот бо об ва риояи қоидаҳои санитарӣ дар ҷумҳурӣ 2 млрд. доллар маблағ зарур аст, ки 1 млрд. 700 млн. доллараш ба барқарор кардани низоми таъмини об ва обу корез лозим аст.

«Айни замон дар 30 шаҳру навоҳӣ дар самти барқарор кардани низоми таъмини об ва обу корез корҳо ҷараён доранд, ки аз ҷониби Бонки аврупоии таҷдиду рушд, Бонки ҷаҳонӣ ва Бонки осиёгии рушд маблағгузорӣ шудааст», - гуфт Тӯйчизода.

Хабарҳои моро дар Telegram пайгирӣ намоед, ба шабакаи мо бо суроғаи  https://t.me/asiaplus  ҳамроҳ шавед.