Палатаи поёнии парлумон аз пешниҳоди ҳукумати Тоҷикистон дар бораи ворид кардани тағйироту иловаҳо ба қонун “Дар бораи Буҷети давлатии Тоҷикистон барои соли 2019” ҷонибдорӣ кард.

Зимни шарҳи ин масъала ба вакилон вазири молияи Тоҷикистон Файзиддин Қаҳҳорзода изҳор дошт, ки мувофиқи нишондиҳандаҳои Буҷети давлатии соли ҷорӣ барои идомаи сохтмони нерӯгоҳи Роғун ҷудо гардидани ҳудуди 2 млрд. сомонӣ пешбинӣ шуда буд.

Вай афзуд, ки ба истифода додани агрегати дуюми нерӯгоҳи Роғун дар моҳи сентябри соли равон нақшаҳои ҳукуматро тағйир дод.

“Дар ниҳояти кор ба идомаи сохтмони нерӯгоҳи Роғун” аз ҳисоби фурӯши коғазҳои қиматнок дар бозорҳои байнулмилалӣ (евробондҳо) дар соли 2017 ва захираҳои ҷумҳуриявии металлу сангҳои қиматбаҳо маблағҳои иловагӣ равона шуданд”, - гуфт вазир.

Ӯ таъкид дошт, ки аввали соли ҷорӣ аз фурӯши металлу сангҳои қиматбаҳо ҳукумат наздики 613 млн. сомонӣ ва аз фурӯши коғазҳои қиматноки давлатӣ (евробондҳо) 1,2 млрд. сомонӣ дар ихтиёр дошт, ки ба қисматҳои даромаду хароҷоти Буҷети давлатӣ барои соли 2019 дохил шуданд.

“Дар ин робита, қисмати даромади Буҷети Тоҷикистон дар соли ҷорӣ на 24,4 млрд. сомонӣ, балки 25,6 млрд. сомониро ташкил дода, сатҳи каср (камбуд)-и он на 0,5%, балки 2%-ро ташкил хоҳад дод”, - таъкид дошт вазири молия.

Пас аз маъқул донистани тағйироту иловаҳо ба “Буҷети давлатии Тоҷикистон барои соли 2019” вазири молия дар мусоҳибаи кӯтоҳ бо хабарнигори “Азия-Плюс” қайд кард, ки афзоиши ҳаҷми касри буҷети давлатӣ ба ҳаёти рӯзмарраи шаҳрвандони кишвар таъсир нахоҳад гузошт.

“Чизеро, ки қонунгузории кишвар дар бахши ҳисоботнокии молиявӣ тақозо мекунад, мо қонунӣ кардем”, - иброз дошт вазир.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.