Бино ба маълумоти Вазорати кишоварзии ҶТ, дар мавсими баҳор 10% аз маҳсулоти кишоварзии пешбинигардида ҷамъоварӣ шудааст. Ҳосили барвақии сабзавот ва полезиҳо зиёда аз 400 ҳазор тоннаро ташкил додааст.
Аз ҷумла ҳудуди 270 ҳазор тонна пиёз, зиёда аз 38 ҳазор тонна сабзӣ, 26 ҳазор тонна бодиринг, 20 ҳазор тонна карам, беш аз 11 ҳазор тонна полезиҳо ва ҳудуди 10 ҳазор тонна помидор ҷамъоварӣ шудааст. Имсол ҳосилнокии сабзавоту полезиҳо ба ҳисоби миёна 32 тонна аз 1 гектарро ташкил медиҳад.
Ғайр аз ин, зиёда аз 103 ҳазор тонна картошка парвариш шудааст. Ҳосили меваҳои барвақтӣ 19 ҳазор тоннаро ташкил додааст. Ҳудуди 92 ҳазор тонна гандум ҷамъоварӣ шудааст.
Дар мавсими нав дар Тоҷикистон парвариши ҳудуди 3,5 млн тонна сабзавот ва полезиҳо, беш аз 1,1 млн тонна картошка, 500 ҳазор тонна мева ва 281 ҳазор тонна ангур ба нақша гирифта шудааст.
Дар ҷумҳурӣ дар майдони 440 ҳазор гектар кишти баҳорӣ гузаронида шуда, дар 180,4 ҳазор гектараш пунбадона ва дар майдони боқимонда зироати ғалладона ва сабзавот кишт шудааст.
Мувофиқи пешгӯии Вазорати рушди иқтисод, дар Тоҷикистон имсол парваришу истеҳсоли 1,6 млн тонна зироати ғалладона, аз ҷумла 975 ҳазор тонна гандум пешбинӣ мешавад. Истеҳсоли пахта бо зиёд шудани ҳиссаи коркарди он дар дохили кишвар дар ҳаҷми 430 ҳазор тонна дар назар аст.
Дар Тоҷикистон имрӯзҳо ҷамъоварии ҳосили барвақтии маҳсулоти кишоварзӣ идома дорад. Дар заминҳое, ки навъҳои барвақтии гандуму ҷав, пиёз ва баъзе дигар навъҳои сабзавот ҷамъоварӣ карда шуда буданд, кишти зироатҳо, аз ҷумла шолӣ, навъҳои тирамоҳии сабзавот, ҷуворимакка, зироатҳои хӯроки чорво ва ғайра барои гирифтани ҳосили дуюм ҷараён дорад.
Қисмате аз ҳосил ба хориҷи кишвар содир мешавад. Аз Тоҷикистон ба хориҷи кишвар асосан пиёз, сабзӣ, карам, мева ва сабзавоти тару тоза, хушкмева ва маҳсулоти кишоварзии коркардшуда - шарбат (афшура) ва консерваҳо интиқол дода мешаванд.
Руcский