Мутахассисони Барномаи ҷаҳонии озуқаворӣ натиҷаҳои таҳқиқотеро омода намуданд, ки дар он чӣ арзиш доштани як коса шӯрбо дар кишварҳои гуногун ва чӣ миқдор фоизи даромади худро ба он сарф кардани одамонро барои тайёр кардани он муайян карданд.

Дар штати осудаву некӯаҳволи Ню-Йорк ба гунаи мисол барои тайёр кардани як коса шӯрбо сокини маҳаллӣ ним фоизи даромади миёнаи якрӯзаи худро харҷ мекунад.

Дар Судони Ҷанубӣ бошад, ин таносуб сесад маротиба бештар аст – сокини ин кишвар барои харидани маҳсулот ва тайёр кардани чунин хӯрок бояд ду рӯз кор кунад, хабар медиҳад Маркази итттилооти СММ.

Дар маълумот қайд мешавад, ки ба сокини Тоҷикистон барои омода кардани як коса ин навъи хӯрок харҷи 9 фоиз ва дар Қирғизистон – 10,4 фоиз аз даромади миёнаи рӯзонааш лозим меояд.

Дар Тоҷикистон ҳадди ақали музди меҳнат ба 400 сомонӣ (42 доллар) ва маоши миёна ба 1 ҳазору 112 сомонӣ (наздики 120 доллар) баробар аст.

Айни замон 821 миллион нафар дар ҷаҳон гуруснагӣ мекашанд. Наздики 155 млн. нафар кӯдакон дар саросари ҷаҳон аз лоғарӣ азият кашида, ҳудуди нисфи марги хурдсолон ба гуруснагӣ марбут аст. Дар ин бора Дабири кулии СММ Антониу Гутерриш дар паёми худ ба муносибати Рӯзи ҷаҳониии озуқаворӣ, ки ҳамасола 16 октябр таҷлил мегардад, хотиррасон менамояд.

Дар СММ таъкид месозанд, ки ғизо натанҳо дастрас, балки хушсифат ҳам бояд бошад, дар акси ҳол, лоғариро фарбеҳӣ иваз мекунад, ки ин ҳам ба солимӣ хатар дорад.

Роҳбари Созмони озуқаворӣ ва кишоварзии СММ (ФАО) Гратсиану да Силва зикр кардааст, ки истеъмоли маҳсулоти аз рӯи технолгияҳо коркардшуда бо таркиби баланди равғану чарб, қанд, намак ва иловаҳои кимиёвӣ ба фарбеҳшавии одамон боис мегардад.

Хабарҳои моро дар Telegram пайгирӣ намоед, ба шабакаи мо бо суроғаи  https://t.me/asiaplus  ҳамроҳ шавед.