Шумори аҳолии Тоҷикистон дар соли 2023 ба 10 млн 129 ҳазор нафар мерасад. Дар ин бора дар Дурнамои нишондиҳандаҳои асосии макроиқтисодӣ барои солҳои 2021-2023, ки моҳи июл аз ҷониби ҳукумати ҷумҳурӣ тасдиқ шуд, хабар дода мешавад.

Гуфта мешавад, аввали соли равон шумори аҳолии ҷумҳурӣ зиёда аз 9 млн 452 ҳазор нафарро ташкил медод. То аввали соли оянда шумори доимии аҳолӣ ба 9 млн 688 ҳазор кас хоҳад расид. Афзоиши шумор ба 2,5% баробар мешавад.

Соли 2022 дар ҷумҳурӣ аллакай 9 млн 931 ҳазор ва соли 2023 - 10 млн 129 ҳазор кас зиндагӣ хоҳад кард.

Дар муқоиса бо соли 2018 соли гузашта сатҳи афзоиши шумори аҳолӣ 2,2%-ро ташкил дод.

Шумори нисбатан зиёдтари аҳолии кишвар - 3 млн 328 ҳазор нафар дар вилояти Хатлон ба сар мебаранд.

Ба ҳолати 1 октябри соли гузашта теъдоди аҳолии вилояти Суғд - 2 млн 690 ҳазор, Ноҳияҳои тобеи марказ - 2 млн 156 ҳазор, шаҳри Душанбе - 855 ҳазор ва ВМКБ - 228 ҳазор нафарро ташкил дода буд.

Қобили зикр аст, ки нимаи аввали моҳи октябри соли ҷорӣ дар ҷумҳурӣ маъракаи навбатии бақайдгирии аҳолӣ ва фонди манзил гузаронида мешавад. Ин маърака дар Тоҷикистон бори охир соли 2010 доир гардида буд.

Ба ҳолати аввали тирамоҳи соли 2010 дар ҷумҳурӣ 7 млн 565 ҳазор нафар аҳолӣ сабт шуда буд, ки 1 млн 438 нафар зиёдтар нисбат ба соли 2000-ум аст.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.