Ҳимоятгари мунтахаби Ӯзбекистон ва дастаи “Ланс”-и Фаронса Абдуқодир Хусанов гаронтарин футболбози минтақаи Осиёи Марказӣ дониста шуд. Мувофиқи маълумоти навшудаи портали Transfermarkt, ӯ 12 млн евро нарх дорад.
Дар зинаи дуюм аз рӯи нархи бозор боз як ӯзбекистонӣ - нимҳимоятгари дастаи “ЦСКА” (Русия) Аббосбек Файзуллоев қарор дорад, ки нархаш 6 млн евро мебошад.
Дар зинаҳои баъдӣ, ҳамлагари “Рома”-и Италия Элдор Шомуродов (Ӯзбекистон) - бо нархи 5 млн евро, нимҳимоятгари мунтахаби Қазоқистон ва тими “Бешикташ”-и Туркия Бахтиёр Зайнутдинов - 4 млн евро, ҳимоятгари дастаи “Зенит”-и Русия Нуралӣ Алип (Қазоқистон) - 3 млн евро ҷойгир шудаанд.
Ба 10-гонаи гаронтарин футболбозони минтақаи Осиёи Марказӣ танҳо 1 намояндаи Тоҷикистон - дарвозабон Рустам Ятимов бо нархи 1,2 млн евро шомил аст.
Ятимов гаронтарин футболбози Тоҷикистон аст. Байни футболбозони тоҷик дар зинаи дуюм Зоир Ҷӯрабоев (“Нефтчӣ”, Ӯзбекистон) ва Алишер Ҷалилов (“Истиқлол”, Тоҷикистон) бо нархи ҳар кадоме - 700 ҳазор евро қарор доранд.
Дар идома футболбозони “Истиқлол” Шамадонӣ Камолов ва Эҳсони Панҷшанбе ҳар кадоме 600 ҳазор евро, Парвиз Умарбоев аз “ЦСКА 1948” (Булғористон) - 500 ҳазор евро, Ваҳдат Ханнонов (“Сипоҳон”, Эрон) ва Олег Баклов (“Уфа”, Русия) - ҳар кадоме - 400 ҳазор евро нархгузорӣ шудаанд.
Гаронтарин футболбоз дар Қирғизистон нимҳимоятгар Гулжигит Алиқулов аз тими “Неман”-и Беларус бо нархи 800 ҳазор евро зикр шудааст. Гаронтарин футболбози Туркманистон Теймур Чариев аз тими “АбдышАты” эътироф шудааст.
Қобили зикр аст, ки дар Ӯзбекистон нархи якбора 13 нафар бозингар 1 млн евро ва зиёда аз онро ташкил медиҳад. Дар Тоҷикистон 1 бозингар ва дар Қазоқистон - 3 бозингар чунин нархҳо доранд. Дар дигар кишварҳои минтақаи Осиёи Марказӣ то арзиши 1 млн дигар касе нарасидааст.
10-гонаи гаронтарин футболбозони минтақаи Осиёи Марказӣ:
1. Абдуқодир Хусанов (Ӯзбекистон), «Ланс» – 12 млн евро.
2. Аббосбек Файзуллоев (Ӯзбекистон), “ЦСКА М” – 6 млн евро.
3. Элдор Шомуродов (Ӯзбекистон), «Рома» – 5 млн евро.
4 Бахтиёр Зайнутдинов (Қазоқистон), «Бешикташ» – 4 млн евро.
5. Нурали Алип (Қазоқистон), «Зенит» – 3 млн евро.
6. Остон Урунов (Ӯзбекистон), «Персеполис» ва Отабек Шукуров (Ӯзбекистон), «Ал-Фейҳа) – ҳар кадоме 2,5 млн евро.
7. Ҷалолиддин Машарипов (Ӯзбекистон), «Эстеглал» – 1,7 млн евро.
8. Абдувоҳид Нематов (Ӯзбекистон), «Насаф»; Ҳусниддин Алиқулов (Ӯзбекистон), «Ризеспор»; Ҳоҷимат Эркинов (Ӯзбекистон), «Ал-Вахда» – ҳар кадоме 1,5 млн евро.
9. Акмал Мозговой (Ӯзбекистон), «Насаф» – 1,3 млн евро.
10. Рустам Ятимов (Тоҷикистон), «Ростов»; Одилҷон Ҳамробеков (Ӯзбекистон), «Навбаҳор»; Шерзод Насрулллоев (Ӯзбекистон), «Насаф»; Максим Самородов (Қазоқистон), «Ахмат» – ҳар кадоме 1,2 млн евро.
Руcский