Душанбе. 22-уми август. ОИ «Азия-Плюс» - Имрӯз аз ширкати саҳомии холдинги кушодаи (ШСХК) «Барқи тоҷик» ба ОИ «Азия-Плюс» хабар доданд, ки то имрӯз сатҳи об дар обанбори Норак ба 894 метр баробар буда, барои расидан ба ҳадди ниҳоии он 17 метр боқӣ мондааст.

Ба иттилои манбаъ, ин ҳафта ҷоришавии оби рӯдхонаи Вахш ба 820-830 метри мукааб дар як сония расидааст. «Дар даҳаи аввали моҳи август ҳангоми 40-43 дараҷа гарм будани ҳарорат миқдори ҷоришавии оби дарёи Вахш 1000-1100 метри мукааб дар як сонияро ташкил медод ва сатҳи об дар як шабонарӯз то 50 сантиметр боло мерафт», - изҳор дошт манбаъ.

Намояндаи ширкати «Барқи тоҷик» зикр кард, ки соли гузашта об дар обанбор 17-уми сентябр то ҳадди ниҳоӣ захира гардида буд. «Тибқи пешгӯиҳои ҳавошиносон, ахири моҳи август ва даҳаи аввали моҳи сентябр ҳарорати гармӣ то 40-43 дараҷа боло меравад ва мо умедворем, ки то ахири моҳи сентябр дар обанбор об то ҳадди ниҳоӣ захира хоҳад гардид», - гуфт намояндаи ширкат.

«Айни замон ҳамарӯза сатҳи об то 17 сантиметр боло меравад ва ҳарчанд то сатҳи ниҳоӣ 17 метр боқӣ монда бошад ҳам, дар ҷумҳурӣ реҷаи маҳдуди истифодаи барқ ҷорӣ нагардидааст», - таъкид сохт манбаъ.