Дар маҷмааи давлатии «Кохи Борбад»-и шаҳри Душанбе нахустин намоишгоҳ-ярмаракаи музофоти Нинсяи ноҳияи мухтори Хуэйи Ҷумҳурии Мардумии Чин ба кор шурӯъ кард, ки то 21 май идома меёбад.

Дар намоишгоҳ-ярмарка молу колои истеҳсолкунандагон ва корхонаҳои тиҷоратии ҳудуди 50 ширкатҳои маъруфи чинии музофоти Нинся ба маърази тамошо гузошта шудааст.

Дар ин намоишгоҳ маҳсулоти корхонаҳои истеҳсоли таҷҳизоти гидроэнергетика, авиатсия, мошинсозӣ, механикӣ, зиддисӯхтор, автомобилӣ, дӯзандагӣ, бастубанди мол, таҷҳизоти шишасозӣ ва нерӯи барқ, истихроҷи ангишт, маҳсулот барои рӯзгору хона ва сарулибос, маводи ғизойии «Ҳалол», маҳсулоти кишоварзӣ, сарулибоси миллӣ, масолеҳи сохтмон, асбобу лавозимоти маишӣ, маснӯот аз пӯсту мӯина ва таҷҳизоту технологияҳои нави энергетикаи алтернативӣ пешниҳод гардидааст.

Чорабинии мазкур аз ҷониби департаменти тиҷорати ҳукумати мардумии музофоти Нинсяи ноҳияи мухтори Хуэйи Ҷумҳурии Мардумии Чин ва Палатаи савдо ва саноати ҶТ бо дастгирии ҳукумати Тоҷикистон созмон дода шуда, ба роҳандозии робитаҳои дуҷонибаи тиҷоратӣ, ҳамкории тиҷоративу иқтисодӣ ва сармоягузорӣ, таҳия ва амалисозии лоиҳаҳои барои тарафайн судманд, густариши минбаъдаи ҳамкории ҳамаҷониба ва гуногунҷанба миёни Тоҷикистону Чин нигаронида шудааст.